Aqmescitte vahşiylikke qarşı narazılıq mitingi olıp keçti

19 Iyül 2012

2012 senesi iyül 19 künü Aqmescitte Sovetler Birliginiñ Eki defa qaramanı Amethan Sultan adına meydanda çeşit millet, çeşit dinlerge ve türlü siyasiy aqımlarğa mensüp insanlar soñki yıllarda Qırımda yüz bergen adiselerge nisbeten narazılıqlarını bildirmek içün toplandılar.

Amethan Sultannıñ Meydanda asılı balaban portretinde tamam yüzünde faşistlerniñ temsili olğan gamalı haç çızılması cemaat ğadabını taşıtqan soñki tamçı oldı.

Qırımtatar gençleriniñ “Yaşlar şurası” teşkilâtı keçirgen mitingde Meclis azaları, Qırımnıñ cemaat teşkilâtları ve şeer sakinleri iştirak ettiler.
İstegenlerniñ episi meydanğa kelip, öz narazılığını kâğıtta qayd ettiler. Soñra bu kâğıt miting qararı sıfatında ait organlarğa berilecek. “Vandallar mesülietlikke çekilsin”, “Vandallar aqlanılmaz”, “Amethan Sultan kibi uçucı dünyada yoq”, kibi fikirler yazıldı.

“Vahşiylik, vandallıqqa nisbeten böyle munasebet köstergen qırımtatar yaşlar teşkilâtlarına teşekkür bildirmek isteyim, – dedi Qırımtatar halqı Meclisiniñ birinci muavini Refat Çubarov.– Bunıñ kibi de men şu mitingde öz narazılığını bildirmek içün bulunğan er bir insandan minnetdarım.

Mında men tek qırımtatarlarnı degil, başqa millet insanlarını da körem ve bu maña ümüt bere. Çünki Amethan Sultan kibi yer yüzünde barışıqlıq olması içün canını feda etken şahıslarnı tiriler qorçalamasa, bunıñ aqibeti pek fena olur”.

Bunıñ kibi de Çubarov iyül 16 künü olğan adise pek çoq insannı ğadaplandırğanını qayd etti. “Men bu aqta eşitip ve ta ki kendim kelip resimge çekmegenge qadar inanıp olamadım, – dedi R. Çubarov. – Bu vahşiyşlikniñ sımarışçısı, icracısı tapılmağance bu barbarlıq ket-kete şouğa çevrilir”.

Çubarov, bu vahşiylik hususında soñki künler içinde iç bir kimse izaatlamağanını keder ile qayd etip, belki yaparlar, degen ümütni bildirdi. “Sovetler devletinde Amethan Sultannı bilmegen, onıñ ögünde temenna etmegen iç bir insan yoq edi. O, 30 uçaqnı şahsen özü, 19 uçaqnı ise arqadaşlarınen beraber urıp tüşürgen aqiqiy qaraman edi. Yapılğan bu areket sadece vandallıq degil, bu – cinayettir, – dedi arbiy ava küçleriniñ istifadaki polkovnigi İgor Şçennikov.

Meclis Kâtibiyetiniñ başı Zair Smedlâyev bugüngece daa bir vandal cevapqa çekilmegenini ayttı. “Amethan Sultannıñ yüzünde çızılğan gamalı haç bizim qalplerimizni teşken haçtır, bütün qırımtatar halqınıñ yüzüne, cenkte qan tökip, qurban ketken bütün askerlerniñ hatırasına tükürüktir, -dedi Z. Smedlâyev. . Çıqışınıñ soñunda o dedi ki, vandallarnı yaqalap cezalandırmaq akimler içün şeref meselesidir.

Narazılıq mitingi devamında belli oldı ki, İçiki İşler Nazirliginiñ İnternet saifesinde Qırımda Sovetler Birliginiñ Eki defa qaramanı Amethan Sultannıñ portretini aqaret etüv alı belgilenmegeni aqqında malümat berilgen. Bundan da ğayrı portret asılı evniñ sakinleri ve meydanda ticaret yapqan insanlarnıñ iç birisi “portretni aqaret etken iç bir türlü plakat körmegenini söylegenler”.