Refat Çubarov: «№ 5515 qanun leyhası – qırımtatar halqına nisbeten tarihiy adaletni tiklev yolunda ilk adımdır»

17 Iyül 2012

2012 senesi iyül 17-de 5-nci çağırılış Qurultaynıñ olacaq 4-nci sessiyası arfesinde olıp keçken matbuat konferentsiyasında Qırımtatar halqı Meclisi reisiniñ birinci muavini Refat Çubarov Mustafa Cemilevniñ müellifliginde “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Ukraina qanun leyhasınıñ birinci oquvda qabul etilmesini izaatladı.

“Men şunı qayd etmek isteyim ki, birinci oquvda qabul etilgen leyha 2004 senesi 385 rey qazanğan leyhadan pek farq etmey. O qanun leyhası müellifleriniñ biri men edim. Şunı aytmaq isteyim ki, № 5515 qanun leyhası – qırımtatar halqına nisbeten tarihiy adaletni tiklev yolunda ilk adımdır”, – dedi Refat Çubarov.

Bunıñ kibi de o, qanunnıñ amelge keçirilmesi basqıç-basqıç tafsilâtlı yazılıp, Ukraina devlet büceti içün sezilirli zarar etmez.

Şunı hatırlatamız ki, 2012 senesi iyün 20-de Ukraina Yuqarı Şurası “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında” Ukraina qanun leyhasınıñ birinci oquvda qabul etip, ekinci oquv muzakeresine yolladı. .

№ 5515 Qanun leyhası 2010 senesi cedvelge alındı. Evel böyle leyhanı parlament qabul etken, amma soñra Ukraina Prezidenti tarafından 2004 senesi veto etilgen edi.