Sovetler Birliginiñ Eki defa qaramanı, meşur uçucı Amethan Sultan portretini aqaret etkenlerni Çubarov maneviy vahşiyler, dedi

17 Iyül 2012

2012 senesi iyül 17-de 5-nci çağırılış Qurultaynıñ olacaq 4-nci sessiyası arfesinde olıp keçken matbuat konferentsiyasında Qırımtatar halqı Meclisi reisiniñ birinci muavini Refat Çubarov Sovetler Birliginiñ Eki defa qaramanı, meşur uçucı Amethan Sultan portretini aqaret etkenlerniñ areketlerini böyle izaatladı: “Buña nasıl izaat bermek kerekligini asla da bilmeyim, – dedi Refat Çubarov. – Men şahsen Amethan Sultan adına meydanğa barıp, Amethan Sultan portretinde pis resimlerni körip, şok keçirdim. Siz bilesiñiz, portret pek yüksekte asılı. Amma vahşiyler qara işlerini yapmaqnıñ çaresini tapqanlar…”

Refat Çubarovnıñ tahminine köre, elbetteki soqaqta videokozetüv alıp barıla. Ya militsiya şeerniñ tam merkezinde böyle vahşiylik yapılmasına nasıl yol bere, dep taacüplendi Çubarov ve jurnalistlerge hıtaben, tek ondan degil de şeer akimlerinden de izaat soramalarını tevsiye etti.

“Qırım Yuqarı Şurası endi çoqtan berli şeerdeki ava limanına Sovetler Birliginiñ eki defa qaramanı Amethan Sultannıñ adını bermek hususında qarar qabul etmey. İşte, vazifedar insanlarnıñ lâqaydlığı mına boly aqibetlerge ketire”.

Şunı hatırlatmalı ki, iyül 15-ten 16-ğa keçer gecesi belgisiz şahıslar qırmızı boyanen qaramannıñ yüzünde faşistlerniñ simvolını çızğanlar.