Meclis Krımsk ve Gelencik şeerlerinde afattan zararlanğan semetdeşlernen doğrudan-doğru bağlanmaq içün öz vekillerini yolladı

09 Iyül 2012

Krasnodar ülkesinde tabiiy afat yüz bergen yerde elâk ölgan yüzlernen insanlar arasında qırımtatarlar da bar. Olarnıñ çoqusı 60-70-nci yıllarda sürgünlikten qaytqan, lâkin Qırımda qalmaq imkânını tapalmağanlarından Krımsk, Gelencik şeerlerinde yerleşmege mecbur olğan ediler.

Krasnodar ülkesinde qırımtatarlarnıñ teşebbüsçi gruppaları ta o zamanda şekillenip, Qırımğa qaytuv ve aqlarımıznı tiklev oğrundaki umummilliy küreşte pek faal ve sebatlı ediler. Olarnıñ pek çoqları 90-ncı senelerniñ başında Qırımğa qayttılar, bir qısmı ise Krasnodar ülkesinde yaşar ekenler, Qırımda yerleşip başladı.

Suv basuvında zarar körgenler arasında qırımtatarlar olğanı aqqındaki haberler Qırımtatar halqı Meclisine turmadan kele.

Krımsk ve Gelencik şeerlerinde afattan zararlanğan semetdeşlernen doğrudan-doğru bağlanmaq içün Meclis reisi Mustafa Cemilevniñ avalesi boyunca Qırımtatar halqı Meclisi reisiniñ muavini Ahtem Çiygoz reberligindeki bir gruppa anda yol aldı.

Aynı zamanda Qırımtatar halqınıñ Meclisi cemaatçılıqqa muracaat etip, Krımsk, Gelencik ve Krasnodar ülkesiniñ diger yerlerinde yüz bergen afattan zarar körgen semetdeşlerimizniñ vaziyeti aqqında haber etmekni rica ete. 

Haber ve mesajlarıñıznı Meclisniñ saytına www.qtmm.org ( “Bağlanuv bölügine”), bunıñ kibi de şu tel.  +38066 614 20 56 boyunca bildirebilirsiñiz.

Allah epimizni qorçalasın!