Üsein Çapuh kene Yalta regional meclisiniñ reisi olaraq saylandı

07 Iyül 2012

2012 senesi iyül 7 kun. Yalta regionı qırımtatarlarınıñ konferentsiyası olıp keçti. Onıñ işinde saylanğan ve 8 yerli meclisni temsil etken ve saylanğan 32 azasından 29 neferi iştirak etti.

“Qırımtatar halqınıñ öz-özüni idare etüv milliy organları aqqında nizam”ğa binaen Yalta regional konferentsiyanı regional meclisniñ reisi saylanmasına qadar Yerli meclislerge saylavlarnı azırlav ve teşkil etüv boyunca komissiyasınıñ reisi Refat Çubarov ve komissiya kâtibi Zair Smedlâyev alıp bardılar.

Konferentsiyada Qırımtatar halqı Meclisiniñ reisi Mustafa Cemilev, onıñ muavini Ahtem Çiygoz, Meclis azaları Ali Hamzin ve Zaur Smirnov, bunıñ kibi de Qırımtatar halqı 5-nci çağırılış Qurultayınıñ delegatları iştirak ettiler.

Konferentsiya kün tertibi ve regional meclisni saylav tertibi tasdiqlanğan soñ delegatlar Yalta regional meclis reisini saylav meselesiniñ muzakeresine keçtiler.

Gizli rey berüvniñ neticelerine köre Yalta regional meclisiniñ reisi olaraq kene Üsein Çapuh saylandı.

Delegatlar Yalta regional meclis erkânını tekmillev aqqında qarar aldılar. Üsein Çapuh em yerli meclis reisleri ve aynı zamanda Regional meclis azaları olğan 8 insandan ğayrı Zaur Smirnov, Barabaş Memet ve Qarayeva Zeynebni de regional meclis erkânına kirsetmekni teklif etti. Teklifke er kes qoltuttı.

Milliy Meclis reisi Mustafa Cemilev Yalta regional meclisiniñ reisi Üsein Çapuhnı hayırlap, oña ve Yalta regional meclisiniñ bütün azalarına semereli çalışmaqnı tiledi.

Şunı hatırlatmalı ki, Yalta regionınıñ yerli meclislerine saylavlar aprel 29 künü umumiy, musaviy ve doğrudan-doğru gizli rey berüv yolunen keçirilgen edi.
Rey berüv neticelerine köre 8 yerli mecliske 32 aza saylandı.

Umumen Yalta regionı boyunca saylavcılarnıñ aktivligi 52 fayıznı teşkil etip, bulardan eñ yüksek köstergiçni Livadiya qasabası (89 fayız), eñ aşağı köstergiçni ise Yalta (39 fayız) elde ettiler.