Ükümran koalitsiya «Ukraina etnik milliy siyaseti: muvafaqiyetleri ve istiqballeri» mevzusında parlament diñlevleriniñ tevsiyeleri aqqında Qararnı red etti

05 Iyül 2012

“Ukraina etnik milliy siyaseti: muvafaqiyetleri ve istiqballeri” mevzusında parlament diñlevleriniñ tevsiyeleri aqqında Qararnı qabul etüv meselesi 2012 senesi mayıs 16-da parlament tarafından muzakere etilip, qoşumca işlemek içün ait komitetke yollanılğan edi.

2012 senesi iyül 5 künü mezkür Qarar reyge qoyuldı, amma qabul etilmedi.

“Ukraina etnik milliy siyaseti: muvafaqiyetleri ve istiqballeri” mevzusında parlament diñlevleriniñ tevsiyeleri aqqında Qararnıñ qabul etilmesi içün olğanı-olacağı 42 nefer Ukraina halq deputatı rey berdi. Muhalifet küçler, belli ki, rey berüvde iştirak etmeyler.

Qırımtatar halqı Meclisiniñ reisi, Ukraina halq deputatı Mustafa Cemilev emin ki, bunıñ sebebi Ukraina Kommunist partiyası fraktsiyası, ilk-evelâ parlament reisiniñ muavini Adam Martınükniñ bu meselege menfiy munasebetinde.

Şunı hatırlatmalı ki, yanvar 11 künü Ukraina Yuqarı Şurasında “Ukraina etnik milliy siyaseti: muvafaqiyetleri ve istiqballeri” mevzusında parlament diñlevleri keçirilip, bu işniñ neticeleri boyunca Ukraina Yuqarı Şurasınıñ İnsan aqları, milliy azlıqlar ve milletlerara komiteti özüniñ mart 21-de olğan toplaşuvında Ukraina Yuqarı Şurasınıñ “Ukraina etnik milliy siyaseti: muvafaqiyetleri ve istiqballeri” mevzusında parlament diñlevleriniñ tevsiyeleri aqqında qarar leyhasını tasdiqlağan edi. Leyhada Ukraina Prezidenti, Yuqarı Şura, Nazirler Şurasına ve diger devlet organlarına berilgen konkret tevsiyeler içinde cümleden

– devletniñ etnik milliya siyasetini şekillendirüv ve amelge keçirüv meseleleri boyunca icra akimiyetiniñ merkeziy organını meydanğa ketirüv,

– etnik milliy siyaset saasında qanunlarnı mükemmelleştirüv, hususan milletelara, ırqlar ve diniy davalarnı qozğaması içün cevapkârlıqnı sertleştirüv,

– “Milliy mensüpligi boyunca sürgün etilgen şahsılarnıñ aqlarını ğayrıdan tiklev aqqında” (No. 5515)> qanun leyhasınıñ acele qabul etilüvi,

-milliy mensüpligine köre sürgün etilgen ve Ukrainağa qaytıp kelgen qırımtatarlar ve diger millet vekillerini yerleştirüv, ukrain cemiyetine qatıluvını teminlev zarurlığı köstere.

“Ukraina etnik milliy siyaseti: muvafaqiyetleri ve istiqballeri” mevzusında parlament diñlevleri tevsiyeleriniñ tolu metininen bu yerde tanış olmaq mümkün.