Ukraina Yuqarı Şurası «Sabriye Erecepovanıñ 100 yıllığını qayd etüv aqqında» Qarar qabul etti

05 Iyül 2012

Mezkür qarar içün 2012 senesi iyül 5 künü Ukraina halq deputatları rey berdiler.

Leyhasınıñ müellifi Mustafa Cemilev olğan qararda 2012 senesi iyül 12 künü meşur qırımtatar yırcısı, Özbekistan halq artisti Sabriye Erecepovanıñ doğğanına 100 yıl tolğanı qayd etile.

Qarar boyunca Ukraina ükümetine qarar qabul etilgen soñ eki afta içinde Sabriye Erecepovanıñ 100 yıllığına bağışlanğan tedbirlerni azırlav ve keçirüv boyunca teşkiliy komitetni meydanğa ketirmege, bunıñ kibi de tantanalı tedbirler planını tasdiqlamaq ve bayramnıñ maliyeviy ve maddiy-tehnikiy ceetten teminlemek avale etildi.

“Sabriye Erecepovanıñ 100 yıllığını qayd etüv aqqında” Qararda daa bir sıra tevsiye ve teklifler olıp, cümleden Sabriye Erecepovanıñ naaşını Taşkentten ketirip, doğğan yeri Bağçasarayda defn etmek boyunca tedbirlerni amelge keçirmek közde tutula. Ukraina Devlet radio ve televideniye komitetine qırımtatar halqınıñ yırcısı Sabriye Erecepovanıñ ömüri ve icadına bağışlanğan tele ve radioyayınlarnı teşkil etmek, kütleviy matbuat vastalarına ise yırcınıñ 100 yıllığı munasebetinen keçirilgen tedbir-merasimlerni aydınlatmaq, “Ukrpoçta” devlet işhanesine Sabriye Erecepovanıñ resimleri olğan poçta markalarını basmaq, Sabriye Erecepovanıñ yırlarından ibaret disk azırlamaq avale olundı.

Qararnıñ eda etilmesini Ukraina Yuqarı Şurasınıñ İnsan aqları, milliy azlıqlar ve milletlerara munasebetler boyunca komitet nezaret etecek. 10438 raqamlı “Sabriye Erecepovanıñ 100 yıllığını qayd etüv aqqında” Qarar 2012 senesi iyül 5-ten küçke kire.

Şunı hatırlatmalı ki, Qırımtatar halqı Meclisiniñ reisi, Ukraina halq deputatı Mustafa Cemilev 2012 senesi mayıs 7-de Ukraina Yuqarı Şurasında “Sabriye Erecepovanıñ 100 yıllığını qayd etüv aqqında” 10438 raqamlı Qararnıñ leyhasını cedvelge aldırdı.

Malümat içün: Sabriye Erecepova (12.07. 1912 g. – 18.09.1977 g.) – qırımtatar halqınıñ meşur yırcısı, Özbekistanda hızmet köstergen artisttir.
Onıñ icrasında er angi yır halq yırına çevirildi. Bütün ayatı ve icadını tuvğan halqına bağışlağan Sabriye Erecepova özünden soñ miras olaraq halq yırına büyük sevgini qaldırdı.

Sabriye Erecepova – birinci olıp qırımtatar yır folklorını sanada professional seviyede numayış etti. O, faqat öz halqınıñ yırlarını yırlap, icra ustalığınıñ örnegi oldı. Bugünde-bugün onıñ adını bilmegen ve onıñ ile ğururlanmağan iç bir qırımtatarı yoqtır.