Ayserezde köydeşler körüşüvi

02 July 2012

Er sene iyül ayınıñ birinci bazar künü Sudaq rayonınıñ dülber manzaralı köylerinden biri olğan Ayserezde köydeşler körüşeler. Bu yılı olar şu tedbirni endi 23-ci kere keçirdiler.

İyülniñ birinci künü er yılı olğanı kibi sabadan Ayserez köyüniñ sakinleri, em doğma ayserezliler, em de 1944-te sürgün etilgen insanlarnıñ bala ve torunları toplanıp başladılar. Körüşüvge yalıñız Qırımnıñ çeşit yerlerinden degil de, Ukraina ve Rusiye, Türkiyeden de keleler.

Ayserezliler köyniñ eñ qartı, çoqtan-çoq torun ve torunçelerinen körüşüvge kelgen 103 yaşlı Alime qartana ve 91 yaşlı Üsein dedege ayrıca sayğı kösterdiler.

Qırımtatar halqı Meclisiniñ reisi Mustafa Cemilev de er yılı körüşüvge mıtlaqa kelip, köydeşleriniñ körüşüvinde iştirak ete. Türkiyeniñ İstanbul şeer qırımtatar derneginiñ başı Celâl İçten, Sudaq regional meclis reisi İlver Ametov, Qırım tarihçıları birliginiñ koordinatorı, ATR telekanalında “Tarih sedası” programmasınıñ alıp barıcısı Gülnara Bekirova, “Tezis” neşriyatınıñ direktorı Ediye Müslimova, ATR telekanalı ve QHA jurnalistleri Ayserezdeki bayramnıñ musafirleri oldılar.

Köydeşlerine hıtap etken Mustafa Cemilev olarğa birlikni qaviyleştirgenleri ve doğğan yerlerine sadaqatları içün teşekkür bildirip, adaletni tiklevniñ uzun ve mürekkep ceryanı aqqında söyledi. Meclis reisi bunıñ kibi de 2012 senesi iyün 20-de qırımtatar halqınıñ aqlarını qorçalaycaq qanun leyhası Ukraina halq deputatları tarafından birinci oquvda qabul etilgeni boyunca malümat berdi.

“İleride bizni saylavlar bekley, qanun leyhasınıñ taqdiri işte olarnıñ neticelerine bağlıdır, – devam etti sözüni M. Cemilev. – Bu munasebetnen 2012 senesi iyül 22 künü Qurultay delegatları nevbetteki sessiyada kelecek saylavlarda qırımtatarlarnıñ pozitsiyasını belgilegen qararnı alacaqlar”.

Mustafa Cemilev Ayserez faalleriniñ doğğan köy ve sakinleriniñ tarihı aqqında kitapnıñ neşirine büyük istek ile qoltutacağını bildirdi.

Bayram devamında Refat Çubarovnıñ ve yerli meclisniñ teklifi boyunca umumiy hatıra resimi çekildi. Dağlar ve köylüler em de AQŞda yaşağan doğma ayserezli Fikret Yurterniñ ğayreti sayesinde ğayrıdan tiklengen çeşme yanında başta Ayserezde 1944 senesi mayıs 18-gece doğğanlarnıñ resimi çekildi. “Olar pek az qaldı, çoqları pek qart oldıqlarından sebep körüşüvge kelip olamaylar”, – dedi Refat Çubarov.

Soñra doğma şu köyden ve olarnıñ bala-torunlarınen beraber resimi çıqarıldı. Bu sene Meclis reisi Mustafa Cemilev içün bayram eki qat quvançlı oldı. Uzun yıllar devamında o, ana-babasınıñ bugünge qadar saqlanıp qalğan evni ziyaret eter edi. Bu evge 1944 senesinden soñ kirip yerleşken adamlar eV yanında bulunmağa izini berip, içeri kirsetmez ediler. Ve niayet bu yılı eV kene öz saiplerine qayttı – Mustafa Cemilev ağası Asan ile bu evge endi qanuniy saipleri olaraq ayaq bastılar. Evde anaları Mahfure Hatip Ümer qızı ve babası Abulcemilniñ fotoları qoyulıp, olarnıñ hatırasına dua oquldı. .

Sürgünlikten evel Mustafa Cemilevniñ ana-babası devrinde bu evde Abdulcemil ağa açqan qave Ayserezniñ eñ yahşı qavelerinden biri sayılğan. Ana-babasınıñ evini satın alğan Mustafa Cemilev yerli mecliske bu evde köy ve köylülerniñ tarihiy müzeyini açmaqnı teklif etti.

Ana-babası Ayserezden olğan Refat Çubarov da körüşüvge kence qızı Niyara ile keldi. Köydeşler ögünde çqışta bulunırken o, yaqın vaqıtta sürgünlikten soñ klubğa çevrilgen köy camisini tamirlev işleriniñ başlanacağını haber etti.

Bayram neşesi daa uzun vaqıtqace sürdi. Qartlarnıñ tesirli ikâyelerini diqqat ile diñlegen yaşlar ayat dersi aldılar. Dülber halq nağmeleri ise dağlar üzre yañğıradı.