Aluşta regional meclisiniñ reisi saylandı

30 June 2012

2012 senesi iyün 30-da Aluşta rayonı qırımtatarlarınıñ regional konferentsiyaları ötkerildi. Onda delegat olaraq 7 yerli meclislerge saylanğan 45 insan iştirak etti.

“Qırımtatar halqınıñ öz-özüni idare etüv milliy organları aqqında nizamname” boyunca Aluşta rayonı qırımtatarlarınıñ regional konferentsiyasını aluv baruv ta regional meclis reisi saylanmasına qadar Yerli meclislerge saylavlarnı azırlav ve teşkil etüv komissiyasınıñ reisi Refat Çubarov ve komissiyanıñ kâtibi Zair Smedlâyevge avale etildi.

Konferentsiyada musafir olaraq Qırımtatar halqı Meclisiniñ reisi Mustafa Cemilev, onıñ muavinleri Remzi İlyasov ve Ahtem Çiygoz, Meclis azası Fevzi Kübedinov, bunıñ kibi de Qurultay delegatları iştirak ettiler.

Konferentsiyanıñ kün tertibi ve regional meclisni saylav tertibi tasdiqlanğan soñ delegatlar Aluşta regional meclisniñ reisini saylav meselesine keçildi. Gizli rey berüv bülletenlerine regional meclis reisligine namzetler Enver Arpatlı ve Ernest Seydametovnıñ adları yazıldı.

Gizli rey berüv neticelerine köre Aluşta regional meclisiniñ reisi olaraq Konferentsiya delegatlarınıñ çoq reylerini qazanğan Enver Arpatlı saylandı.

Soñra delegatlar Aluşta regional meclis erkânını şekillendirmek qararını aldılar. Mecliske 7 yerli meclis reisleri, ve Enver Arpatlınıñ teklifi boyunca qoşumca olaraq Rustem Ğafarov ve Ziya Seytmemetov de kirsetildiler.

Konferentsiyanıñ soñunda delegatlar regional meclisniñ iş planını muzakere etip, reisniñ er bir yerli meclis öz iş planını ve vatandaşlarnı qabul etüv dejdvelini tizmek teklifine qoltuttılar.

Meclis reisi Mustafa Cemilev Aluşta regional meclisniñ yañı saylanğan reisini hayırlap, konferentsiya iştirakçilerine konferentsiyanı “Qırımtatar halqınıñ öz-özüni idare etüv milliy organları aqqında nizamname”ge muvafıq keçirgenleri içün teşekkür bildirdi.

Meclis reisi uzun bir vaqıt Aluşta regionında yerli meclis asla çalışmağanını hatırlatıp, yañı saylanğan reis meclis işini tertipke ketirecegi ve aktivleştermesine ümüt etkenini söyledi. Bunıñ kibi regional meclis azalarına Qırımtatar halqı Meclisi ve Qurultayınıñ qararlarına esaslanaraq semetdeşlernen sıqı işbirlikte bulunmaqnı tevsiye etti.

Şunı hatırlatmalı ki, nevbetten tış saylavlar Aluşta, Büyük-Lambat, Körbekkul ve Kuçuk-Üzen meclislerinde 2012 senesi aprel 28-de keçirilgen edi. Doğrudan-doğru gizli rey berüv neticeleri boyunca dört saylav okruglarında açılğan yedi saylav uçastkalarında yerli meclislerge kösterilgen 45 namzetten 32 aza saylandı. Mezkür yerlerde saylavlar Qırımtatar halqı Meclisiniñ yerli meclislerniñ vekâletligini müddetinden evel toqtatuv qararına binaen keçirildi

Böyleliknen Aluşta rayonındaki bütün qasabalarda yerli meclisler saylandı. Aluşta regional konferentsiyasına qadar olar endi özleriniñ birinci toplaşuvlarını keçirip, reis ve yerli meclis kâtiplerini sayladılar.