BMT Aliy Komissarı idaresiniñ veb-saytında «Evel sürgün etilgen insanlar ve aileleriniñ azaları içün» degen yañı bölük açıldı

29 June 2012

2012 senesi mayıs ayında Birleşken Milletler Teşkilâtınıñ Belarus, Moldova ve Ukrainadaki qaçaqlarnıñ işleri boyunca Aliy komissarı idaresiniñ veb-saytında “Evel sürgün etilgen insanlar ve aileleriniñ azaları içün” degen yañı bölük açıldı. Bölük BMT Aliy Komissarınıñ Ukrainada idaresiniñ ve İnsan aqları boyunca “Sodeystviye” (Yardım) fondı hadimleri tarafından azırlanıp, semetdeşlerimizni tarihiy vatanğa qaytqanda uquqiy statusını belgilev esnasında haberdar etmekni közde tuta.

Yañı bölük 2012 senesi mayıs 18-de BMT Aliy komissar idaresiniñ vekili Oldrih Andrısek qırımtatarlar halqı matem künü tedbirlerinde iştirak etmek içün Qırımda bulunğan vaqtında taqdim olunğan edi. Yañı bölük ve İnsan aqları boyunca “Sodeystviye” (Yardım) fondınıñ faaliyeti aqqında icra direktorı Ahtem Zeytullayev ikâye ete.

– Ahtem-bey, böyle malümatnı ille şimdi bermege ne mecbur etti?

– Ebet, böyle malümatnı ertece bermek kerek edi. Amma bu, aynı bugün lâzim oldı. Taqdim etilgen malümat insanlarnıñ ögünde turğan bütün suallerge cevap berip olamaz, amma onda Fondımıznen bağlanmaq içün informatsiya berile. Biznen bağlanğan insanlarğa qanunnıñ inceliklerini añlamağa yardımcı olurmız.

Sürgünlikten qaytqanlarğa Ukraina vatandaşı olmaq, olarnıñ balalarına ise köçip kelmege izin almaq tertibini azırlamaq kerek. Çünki soñki yıl içinde Ukrainada yabancılar ve vatandaş olmağan şahıslarnıñ bulunmasına ait tertip bayağı deñişti. Öz vesiqalarını vaqtında tertipke ketirmegen insanlar “qolaysız vaziyetke” tüşip, devletni terk etmek, cöreme tölemek zoruna qaldılar.

Qırımda bulunğan ve yardımğa muhtac insanlar bizim ofisimizge muracaat etebilirler. Lâkin bizim informatsiyamız çoqça yurt tışında yaşağan insanlar içün zarur. İnternet vastasınen insanlarnıñ vesiqalarınıñ köçürmesini baqmaq ve elektron mektüpler şekilinde cevap bermek imkânı peyda olacaq.

– Qanunğa kirsetilgen deñişmeler aqqında tafsilâtlıca bilmek mümkünmi?

– Eger qısqadan aytacaq olsaq, yahşı tarafı – bu pasportta Ukrainada 90 kün bulunmağa izin bergen müür sıñırdan keçilgeninen basılmasıdır. Ukrainada resmiy sürette 90 kün bulunmaq mümkün. Menfiy tarafı ise – resmiy qayd oluvnıñ müddeti ancaq 90 künnen sıñırlanmasıdır.
Eger ariza bergen insanlar vatandaş olmaq, immigratsiyağa izin almaq içün vesiqalarını bergen olsa ya da hastalanıp qaytmağa çaresi olmasa Qırımda bulunuv müddetini devam ettirmek mümkün.

– Fondğa çoq adam muracaat etemi?

– Biñge yaqın insanğa yardım etmege tırıştıq. Bularnıñ çoqusı Fondğa bir qaç kere muracaat ettiler.

– Sürgün etilgenlerge Fond nasıl yardım ete?

– Teşkilâtımıznıñ baş maqsadı – qaçaqlarnıñ, sığınaq qıdırğan ve sürgün olunğanlarnıñ ve aile azalarınıñ uquqiy meselelerini çezüvde yardım etmektir. Yani insanlarğa sıñırnı keçip Ukraina vatandaşı olğanğa qadar qanuniy mesleatlar beremiz, Bazı allarda vatandaş olğan arizacılar endi Özbekistan vatandaşlığından çıqmaq, nefaqa almaq, devlet organlarına muracaat etmek kibi işlerde de yardım soraylar.
Lâzim olğanda Fondnıñ köçebe ofisi konsultatsiya bermek içün Qırımnıñ er angi köşesine barabilir.

Yañı sayttaki infoormatsiyanı bu yerde baqmaq mümkün – www.unhcr.org.ua

Fondnen bağlanmaq içün:

Adres: 95034, Qırım, Aqmescit ş., Kiyevskaya soqağı, 77/4, kab. 215

Telefonlar. (0652) 27-64-36; (066) 063-05-63 (cep)

e-mail: assistfoundation@mail.ru