Refat Çubarov: Qırım – milliy-territorial cumhuriyet olması kerek

29 Iyün 2012

Bu aqta Meclis reisiniñ birinci muavini, Bütündünya qırımtatarlar kongressiniñ prezidenti, Qırım Yuqarı Şurasınıñ deputatı Refat Çubarov iyün 28 künü “Krım” DTRK efirinde “Açıq siyaset” adlı tok-şou vaqtında ayttı, dep haber ete Krimskotatarske pitannâ online internet saifesi.

Refat Çubarov Qırımğa ayrıca bir status berilmek kerekligini, bugünki statusı cemaatçılıqnıñ menfaatlarına cevap bermegenini qayd etti. Çubarov er bir halqnıñ öz-özüni belgilev uquqına aqqı olğanını hatırlattı. “Qırımtatarlarnıñ öz-özlerini belgilemek aqları bar!, – dedi Bütündünya qırımtatarlar kongressiniñ prezidenti.

Misal içün siyasetçi Rusiyeniñ territorial qurumını ketirdi, anda “onlarnen böyle muhtariyatlar mevcut ki, angilerinde tamır halq yerli ealiniñ az qısmını teşkil ete”. “Em bu yerde muhtariyatnıñ adı müim degil, müimi – onda insanlarnıñ aqları nasıl qorçalanğanıdır”, dedi Çubarov.

Onıñ fikrince muhtariyatnıñ vekâletligini, meselâ tarihiy abidelerni qorçalav saasında, imkânlarını kenişletmek lâzim. Bir sıra müim meselelerniñ çezilmesi içün de bu imkânlarnıñ artması zarur. Aqmescit ava limanına Amethan Sultannıñ adını bermek meselesi de aynı şu Qırım akimlerinde böyle vekâletlik yetişmegeni sebebinden çezilmeyip qaldı. Bundan da ğayrı qırımlı siyasetçi Nataliya Kiselöva yayında Qırımtatar halqınıñ Meclisini “cinaiy teşkilât” degeni Çubarovnı açuvlandırdı. “Bu aqta Ukraina Telükesizlik Hızmetine çaqabilirsiñiz”, – dep cevap berdi Meclis reisiniñ birinci muavini.

“Muhtariyatnıñ baş belâsı alimler yetişmegeninde, çünki azlıqlarnıñ aqları devletniñ baş qanunında keregi kibi aydınlatılmağan. Şunıñ içün, – dedi siyasetçi, – milliy azlıqlarğa birleşmek kerek”.

Çubarov siyasetçige Qırımtatar halqınıñ Meclisi uquq meydanına kirsetilmegenini onı qanunsız demege esas bermegenini añlatmağa tırıştı. “Meclis daima olacaq”, – kestirdi Çubarov.

Tok-şounıñ baş mevzusı olğan Ukraina Anayasası hususında siyasetçi “yaramay Anayasalar olmay, olarnıñ amelge keçirilmegeni yaramay”, dep qayd etti. “Anayasanı ürmet etemmi, degen sualge cevap bermege istegen adam başta özüni ürmet etkeni aqqında aytmalı”, – dedi Refat Çubarov.

Malümat içün:   1996 senesi 28 iyün künü Ukraina Yuqarı Şurası Ukraina devletiniñ ilki Anayasasını tasdiqladı. Deputatlar leyha üzerinde sessiyalar salonında qalıp iyün 27-sinden 28-ge keçer gecesi de çalıştılar. Anayasada mustaqil Ukrainanıñ uquqiy esasları, onıñ serbestligi ve territorial bütünligi pekitildi.Ukraina Anayasası tasdiqlanğan künü devlet bayramı – Ukraina Anayasası Künüdir.