Qırımda Milliy bayraq künü qayd etildi

27 Iyün 2012

26 iyün künü Aqmescitniñ merkeziy meydanında Qırımtatar milliy bayraq künü qayd etildi .

“Yaşlar şurası”, “Qardaşlıq”, “Yaşlar sedası” gençler teşkilâtlarınıñ teşebbüsi ve teşkilâtçılığında er yılı ötkerilgen bayram Meclis ve Bütündünya qırımtatarlar kongressiniñ qoltutuvında keçirile.

Bayram tedbirleri çerçivesinde iyün 26 künü saba “Aqmescit – Bağçasaray – Aqyar”, “Aqmescit – Saq – Kezlev”, “Aqmescit – Büyük Onlar –Qurman – Canköy”, “Aqmescit – Qarasuvbazar – Sudaq – Eski Qırım – Kefe” i “Aqmescit – Mamut Sultan – Aluşta – Yalta” yönelişleri boyunca Bütünqırım avtoyürüşüi yapıldı. Yürüş iştirakçileri kene Aqmescitte toplanıp, Hoşkeldi qasabasında bir kolonnağa birleşip sıranen meydanğa keldiler. Şu künniñ ekinci yarısında ise balalar yerde resim sızuv yarışında, genç küreşçiler ise milliy küreş tutuşuvlarında küçlerini sınadılar. Bunıñ kibi de meydanda milliy yemekler yarışı ve fotoresimler sergisi de açıldı.

Bayramnıñ baş simvolı ise 252 kavdrat metr büyüklikte qocaman bayraq oldı.

Bayram iştirakçilerini “Tatlı ses” yarışınıñ ğalipleri oyun ve yırlarınen eglendirdiler.

Tedbirniñ birinci qısmından soñ Qırımtatar halqı Meclisi reisiniñ birinci muavini, Bütündünya qırımtatarlar kongressiniñ prezidenti Refat Çubarov, Qırım musulmanlarınıñ müftisi acı Emirali Ablayev ve bayram teşkilâtçılarından biri Ayder Acimambetov sanağa köterildiler.

“Bugün bu meydanda büyük bayram – Qırımtatar milliy bayraq künü. Bu – dedelerimizniñ çoqyıllıq arzusı edi. Olar canlarını ortağa qoyıp küreştiler ki, bayrağımız kene Vatanğa qaytsın, – dedi müfti efendi. Qırımtatarlarnıñ er bir nesili halqımız çekken o künlerini unutmamalı. Teessüf ki, küreşni başlağan insanlarnıñ sayısı künden-künge eksile. Olarnıñ unutmamaq – bizim borcumızdar”.

Qırım musulmanlarınıñ müftisi acı Emirali Ablayev üyken nesil qırımtatar gençleriniñ milliy ruhu ve terbiyesinen ğururlanğanını söylep, yaşlarğa Allahtan ğayrı başqa iç bir kimseniñ ögünde tiz çökmemekni tenbiyeledi. “Böyle qocaman bayram keçirmekni halqımız çoq yıllar tasavur bile etalmadı, – dep başladı Müftiden soñ söz alğan Refat Çubarov. – Eminim ki, bugün mında yelpiregen bayraqlar mıtlaqa ükümet binalarında da tiklenecek.

Eger biz bayrağımıznı elimizde qaviy tutsaq, o binalarnıñ töpesinde de bayrağımıznı tiklermiz. Eger bir birlikli olıp, biri-birimizni sevsek o öz ana toprağımızğa saip olurmız”. Refat Çubarov bunıñ kibi de bayram teşkilâtçılarınıñ işine yüksek qıymet kesip, Romaniyadan bayramda iştirak etmek içün kelgen balalarğa da teşekkürler bildirdi. “Qırımtatar bayrağı er kes bu meydanğa topladı”, – dedi Qırımtatar halqı Meclisi reisiniñ birinci muavini, Bütündünya qırımtatarlar kongressiniñ prezidenti.

Hayırlav sözlerinden soñ bayram arfesinde ilân etilgen bir sıra yarışlarnıñ ğaliplerini mukâfatlav merasimi keçirildi.
Bayramnı qırımtatar estradasınıñ yıldızları yaraştırdılar.