Qırımtatar halqı Meclisiniñ delegatsiyası Köstence şeer memuriyetinde qabul olundı

25 Iyün 2012

2012 senesi iyün 25 künü Qırımtatar halqı Meclisiniñ Ali Hamzin, Zaur Smirnov, Bekir Ganiyev, Romaniya Türk-tatar demokratik birlikniñ reisi Celil Erecep, Romaniya Türk-tatar demokratik birlikten Romaniya parlamenti deputatlığına namzet Varol Amet, Romaniya Türk-tatar demokratik birlikniñ baş kâtibi Aydun Kurt-Molla, Romaniya Türk-tatar demokratik birlik reisiniñ muavinleri Birol İbadula, Demirel Kayali, Naci Celâl terkibinde delegatsiyasını Köstence şeeriniñ yolbaşçısı Detsebal Fagaday qabul etti. 

Körüşüv devamında Qırım ve Köstence arasında sıqı işbirlik meseleleri muzakere etildi. Belli ki, Köstenceniñ Dobruca qasabasında pek çoq qırımtatarlar yaşamaqta. Söyleşüvlerden soñ Romaniya Türk-tatar demokratik birlikniñ ofisinde Romaniya kütleviy matbuat vastaları içün Celil Erecep ve Varol Amet teşkilâtlandırğan matbuat konferentsiyası keçirildi.

Onda Qırımtatar halqı Meclisiniñ delegatsiyası da iştirak etti. Şu künniñ özünde Meclis delegatsiyası Varol Amet ile beraber Köstence mezarlığına barıp,2010 senesi dekabr ayında vefat etken Romaniya Türk-tatar demokratik birlikniñ fahriy prezidenti rahmetli Saladin Aciqaynıñ qabirini ziyaret etti. 

Romaniya Türk-tatar demokratik birlik reisi Qırımtatar halqı meclisi delegatsiyasınıñ şerefine bergen ziyafette Romaniya parlamentiniñ deputatı Aledin Amet ile subetleşildi.