Meclis reisi Mustafa Cemilev Ukraina Baş naziriniñ muavini Sergey Tigipko ile körüşti

25 Iyün 2012

“Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” Ukraina Qanunınıñ leyhasını qabul etüv meselesini muzakere etüv çerçivesinde Qırımtatar halqı Meclisiniñ reisi, Ukraina halq deputatı Mustafa Cemilev Ukraina Baş naziriniñ muavini İçtimaiy siyaset naziri Sergey Tigipko ve onıñ birinci muavini Vasiliy Nadraganen körüşti.

Körüşüv devamında Mustafa Cemilev Qanun leyhasını Ukraina ükümetinen birlikte muzakere etip, onıñ tezce küçke kirmesiniñ zarurlığını qayd etti.

Subetlerniñ neticesine köre mezkür meselede işbirlik modeli qabul etildi yani Ukraina İçtimaiy siyaset naziri Sergey Tigipko yolbaşçılığında işçi gruppası tizilip, oña menfaatdar nazirlik ve idarelerniñ celp etilmesi añlaşıldı.

Belli ki, 2012 senesi iyün 20-de Ukraina Yuqarı Şurası “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” Ukraina Qanunınıñ leyhasını birinci oquvda qabul etip, ekinci oquvda baqmaq içün yolladı. Qanun leyhası 2010 senesi 5515 nomeri altında cedvelge alınğan edi.

Evel böyle Qanun leyhası parlament tarafından qabul etilgen, lâkin 2004 senesi Ukraina Prezidenti veto aqqını qullanğan edi.