Aqmescit regional meclis vekilleri Aqmescit rayon yolbaşçılarınen körüştiler

22 Iyün 2012

2012 senesi iyün 22 künü Aqmescit rayon devlet memuriyetiniñ binasında Aqmescit regional meclis azalarınen ötkerilgen körüşüvde Aqmescit rayon yolbşaçıları tarafından Aqmescit rayon şurasınıñ reisi Sergey Krutsük, Aqmescit rayon devlet memuriyetiniñ başı Vladimir Jivitsa, rayon uquqqoruv organlarınıñ ve maarif bölüginiñ hadimleri iştirak ettiler.

Körüşüvniñ teşebbüsçisi Lemmar Yunusov baqılacaq meseleler aqqında qısqadan aytıp, böyle dialog keçken yigirmi yıl içinde birinci kere keçirilgeni ve bundan soñ er üç ayda bir kere olacağını bildirdi.

“Körüşüvde semetdeşlerimizniñ bugünki vaziyetine dair eñ aktaul meseleleri muzakere olundı, – dedi Aqmescit regional meclisiniñ reisi, – Esas problemler – bu topraq, qırımtatar tilinde oqutuv, akimiyet organlarınen munasebet ve Aqmescit rayon memuriyetinen daimiy dialoglarnı alıp baruv meseleleridir.

Bunıñ kibi de biz regionımızdaki yerli meclisler reisleriniñ Aqmescit qasaba şuralarındaki temsilciligi meselesini de köterdik. Ümüt etemiz ki, qoyulğan meseleler müsbet çezilir”.

Lemmar Yunusov şunı da qayd etti ki, körüşüv ilk defa ötkerilgeni sebebinden çoqça informatsion-tanışuv tüsüni taşıdı. Aqmescit regional meclis vekilleri rayonıñ eali noqtalarında mevcut problemler ve olarnı çezüv yolları aqqında ayttılar, akimiyet vekilleri ise öz nevbetinde bu meselelerniñ çezilmesi içün areket eteceklerini işandırdılar.

“Daa bir müim mesele, – dedi Yunusov, – “Selskiy trujenik” rayon gazetasına qırımtatar tilinde ilâve çıqarmaq meselesi de baqıldı. Yaqın vaqıtta böyle ilâve neşir etilip, onıñ içün mesülietlik Gvardeyskoye qasaba şurası reisiniñ muavini, yerli meclis reisi Dilâver Ablayevge avale etildi.

Aqmescit regional meclis reisi Lemmar Yunusov bütün köterilgen meseleler, elbette ki, çabuq çezilebilmez, amma eki taraf bir-birini añlağanı ve çalışmağa istek bildirgeni endi quvançlı bir aldır, dedi.