Qırımtatar halqı Meclisiniñ nevbetteki toplaşuvı

11 Iyün 2012

2012 senesi iyün 10-da Qırımtatar halqı Meclisiniñ kenişletilgen toplaşuvı ötkerilip, onda regional meclisler, Qırım Yuqarı Şurası “Qurultay-Ruh” fraktsiyası deputatları, devlet icra akimiyeti organlarında çalışqan qırımtatarlar, cemaat teşkilâtlarınıñ vekilleri ve Qurultay delegatları iştirak ettiler.

Toplaşuvnıñ kün tertibine aşağıdaki meseleler qoyuldı:

Qırımtatar milliy bayraq kününi qayd etüv aqqında;

“Krım”DTRK qırımtatar muarririyetiniñ vaziyeti aqqında;

Aluşta ve Yalta regionları qırımtatarlarınıñ konferentsiyalarını keçirüv aqqında;

Ukraina halq deputatlarını saylav aqqında.

Birinci mesele boyunca qırımtatar yaşlar teşkilâtlarınıñ vekilleri çıqışta bulundılar. Ayder Acimambetov iyün 26 – Qırımtatar milliy bayraq bayramında keçirilecek esas tedbirler – Qırımnıñ 5 noqtasında başlanıp, Aqmescitte yekünlenecek avtoyürüş, Aqmescit meydanındaki kontsert programması aqqında Meclis azalarına tafsilâtlı malümat berdi. Avtoyürüşke qoşulmağa istegenler ise malümatlarnı http://avtoyurush.info/ saifesinden ala bilirler.

Qırımtatar milliy bayraq kününe azırlıq meselesini muzakere etken soñ Meclis azaları gençlerniñ teşebbüsini maqullep, közde tutulğan tedbirler boyunca bir sıra tevsiyeler de berdiler.

Soñra Meclis azaları “Krım”DTRK qırımtatar muarririyetiniñ vaziyetini talil ettiler. Toplaşuvğa davet etilgen “Krım”DTRK qırımtatar muarririyetiniñ direktorı Seitislâm Kişveyev reberligindeki birleşmeniñ maddiy-tehnikiy ceetten ğayet zayıf teminlengeni, qırımtatar tilinde yayınlar içün pek az vaqıt – er kün 30 daqqa ya da aftada 3 saat ayırılğanı, bazar künleri qırımtatar tilinde umumen yayın olmağanı aqqında ayttı. Malüm olğanına köre, Krım”DTRK yolbaşçıları 13 daqqa devam etken “Haberler” yayınına künde merkeziy akimiyet organları, cümleden Ukraina Prezidenti ve Ukraina Nazirler Şurasınıñ faaliyetini aks ettirgen levhalarnı kirsetmekni talap ete.

Tabiiy ki, bu alda Qırım ve qırımtatar halqınıñ siyasiy, sotsial ve medeniy ömürini aydınlatmaq içün iç te vaqıt qalmaz. Bundan da ğayrı qırımtatar tilinde çıqqan bütün yayınlar efirge çıqqanda rus tilinde alt yazıları olmasını talap etkenleri alda bu işni maddiy-tehnikiy ceetten iç pekitmeyler.

Seitislâmi Kişveyev qayd etkenine köre qırımtatar muarririyetiniñ hadimleri qırımtatar tilinde yayınlarnı arttırmaq, şu cümleden Ukraina merkeziy akimiyetiniñ faaliyetini aks ettirmege icadiy ceetten iqtidarlıdır, amma bunıñ içün efir vaqtını çoqlaştırmaq ve muarririyetniñ maddiy-tehnikiy bazasını pekitmek lâzim.

Mesele muzakeresi devamında Meclis azaları Qırımtatar halqı Meclisiniñ reisi, Ukraina halq deputatı Mustafa Cemilev, Qırım Yuqarı Şurasınıñ deputatları DTRK “Krım” qırımtatar yayınlar icadiy birleşmesi hadimlerinen körüşmesiniñ zarurlığını qayd eterek, ait qarar aldılar.

Meclis toplaşuvında Aluşta ve Yalta regionları yerli meclislerine keçken saylavlarnıñ neticelerine yekün çekilip, konferentsiyalarnı keçirüv müddeti belgilendi: Aluşta regionında – iyün 30, Aluşta regionı iyül 7.

Meclis azaları Meclis reisi Mustafa Cemilevniñ Ukraina halq deputatlarını saylav boyunca Ukraina milliy-demokratik küçlernen söyleşüv ve konsultatsiyalar aqqında malümatını diñlep, muzakere ettiler.

Mezkür mesele muzakere etilgende Meclis azaları yekâne printsiplerni işlep çıqıp, olarnıñ esasında Meclis reberlerine siyasiy ortaqlarnen söyleşüvlerni alıp barmaqnı avale ettiler. Söyleşüvlerniñ neticeleri soñundan Qurultay delegatlarınıñ diqqatına taqdim etilecek. Belli ki Qırımtatar halqınıñ Qurultayını 2012 senesi iyül ayında keçirmek planlaştırıla. Regional meclislerniñ reislerine yaqın künlerde er angi seviyedeki saylav komissiyalarına kirsetilecek namzetler cedvelini azırlamaq vazifesi berildi.