Yaltada Qırımtatar medeniy etnografiya merkezi açılacaq

09 Iyün 2012

İyün 12 künü Yaltada Qırımtatar medeniy etnografiya merkezi tantanalı sürette açılacaq.

Yalta faalleriniñ Qırımtatar medeniy etnografiya merkezini açmaq teşebbüsine Qırımtatar halqı Meclisiniñ reisi Mustafa Cemilev, “Fond KRIM” Hayriye teşkilâtı ve Yalta şeer şurası milletlerniñ işleri ve migratsiya boyunca idare yolbaşçısı Zaur Smirnov qoltuttılar. Zarema Menseitova ise eksponatlarnı toplav ve azırlavda faal iştirak etti.

“Fond KRIM” Hayriye teşkilâtınıñ baş direktorı Riza Şevqiyev bildirgenine köre Qırımtatar medeniy etnografiya merkeziniñ tışı qırımtatar üslübinde süslendirilip, merkezniñ er bir odası qırımtatar halqınıñ alemini yani ecdatlarımıznıñ ömür tarzını kösterecek.
“Mustafa ağa Cemilevniñ qoltutuvını ayrıca qayd etmek isterdim, – dey “Fond KRIM” Hayriye teşkilâtınıñ baş direktorı Riza Şevqiyev . – İlle onıñ iştiraki ve Yalta şeer şurasınıñ vekillerinen körüşüvleri sayesinde bizge insanlar yaşamağan bir binanı berdiler. Sağ olsun! Onıñ bu işte issesi ğayet qıymetlidir!”

Riza Şevqiyev merkezde Yaltağa kelgen musafirler ve şeer sakinlerine savut-saba, çalğı aletleri, soba ve daa bir çoq şeylernen yaraştırılğan odalar taqdim etilecegini ayttı.

Qırımtatar medeniy etnografiya merkeziniñ teşkilâtçıları onıñ baş maqsadı medeniy asabalıqnı saqlav, öseyatqan nesilnen çalışuv, halq esnaflarını canlandıruv ve şegirtlerni azırlav olacaq, deyler.

Tantanalı açılış iyün 12 künü saat 13.00-de Yalta şeeri, Kiyevskaya soqağı, 54 lit. A,B adresi boyunca olacaq