Meclis reisi Mustafa Cemilev Kanadanıñ Ukrainada Vefqulade ve Toluvekâletli Elçisi Troy Lulaşnik ile körüşti

08 Iyün 2012

Qırımtatar halqı Meclisiniñ reisi Mustafa Cemilev Kanadanıñ Ukrainada Vefqulade ve Toluvekâletli Elçisi Troy Lulaşnik ile onıñ Kiyevdeki qonutında körüşti.

Kanada Elçisi Troy Lulaşnik öz devletiniñ Ukrainadaki vaqialarğa büyük merağını qayd eterken, bu sırada qırımtatar halqınıñ qaytuvı ve aqlarınıñ tiklenilmesinen bağlı meselege ayrıca diqqat etkenlerini bildirdi. “Çünki Kanada öz memleketinde çoqmilletli barışıqlı cemiyet ve büyük ukrain diasporasını şekillendirüvde zengin tecribege maliktir”, – dedi Elçi.

Öz nevbetinde Meclis reisi Kanada ükümeti ve halqına Ukrainada demokratik deñişmelerge ve qırımtatar halqınıñ sürgünlik yerlerinden qaytmasına qoltutuvı içün teşekkür bildirdi. Taraflar memleketteki vaziyetni ve qırımtatarlarnıñ esas meselelerini talil ettiler

Mustafa Cemilev Kanada elçisine Ukraina parlamentinde “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında”ki Qanun leyhası muzakeresi ve OSCE imayesinde Sürgün etilgenlerniñ problemleri boyunca halqara forumğa azırlıqnıñ ketişatı aqqında malümat berdi.
Körüşüv soñunda Kanada elçisi Troy Lulaşnik dialognı devam ettirmek teklifinde bulundı, Meclis reisi Mustafa Cemilev ise Elçini Qırımnı ziyaret etmege davet etti.

Körüşüvde Kanada elçisiniñ yardımcıları Gregori Lemermayer ve İrina Lavriv, bunıñ kibi de Meclis reisi, Ukraina halq deputatınıñ yardımcısı Aleksey Skorik iştirak ettiler.