Meclis reisi Mustafa Cemilevniñ «Kommunizm cinayetleriniñ aqibeti yoq etilmeli» Halqara konferentsiya iştirakçilerini selâmlavı

07 Iyün 2012

“Kommunizm cinayetleriniñ aqibetleri yoq etilmeli”
Halqara konferentsiyasınıñ iştirakçilerine!

Sayğılı hanımlar ve cenaplar!

Bugün Ukraina parlamentinde bulunmağa mecbur olğanım sebebinden “Kommunizm cinayetleriniñ aqibetleri yoq etilmeli” halqara konferentsiyada iştirak etip olamayım.

Belli ki, 68 yıl evelsi 1944 senesi mayıs 18-de Qırım toprağında insanlıqqa qarşı cinayet yapıldı. Onıñ maqsadı Qırımnıñ tamır halqı ve insaniyetniñ özgün halqlarından biri olğan qırımtatar halqını yoq etmek edi. Qırımtatar halqınıñ öz toprağından sürgün etilmesiniñ ve HH asırnıñ 80-nci yıllarınıñ soñunace ğurbet illerde zorluqnen tutulğanınıñ facialı aqibetleri alâ bugünge qadar yoq etilmedi.

Halq daa tolusınen qaytmadı, on biñlernen qırımtatarlar sürgünlik yerlerinde yaşamaq zorundalar. Nice meşaqtlar ve ğayıplar esabına öz yurtuna qaytqan 260 biñ qırımtatarlarnıñ çoqusı ise aileleri içün iç bir türlü şarait yaratıp olamaylar. Mustaqilliginiñ ilân etilgeninden yigirmi yıldan ziyade vaqıt keçtigi Ukraina qırımtatar halqınıñ aqlarını ğayrıdan tiklenmesi, öz doğğan toprağında pekinmesi ve inkişaf etmesini teminlegen iç bir qanunnı qabul etmedi. Lâkin qırımtatar halqı zorbalıqsız küreş printsiplerine sadıq olğanı alda ukrain cemiyetiniñ demokratik küçlerine bazanaraq, Qırımnıñ tamır halqınıñ aqları da temin etilgen mustaqil Ukrainanıñ demokratik inkişafı ve adalet tiklenmesi içün küreşlerini devam etmege azırlar.

Qırımtatar halqınıyeñ Meclisi Çehiya Cumhuriyeti ükümet kâtipligi Totalitar rejimleri araştırma institutınen birlikteki teşebbüsi boyunca 2011 senesi küzde meydanğa ketirilgen ve Avropa parlamenti tarafından maqullengen “Avropa hatıra ve vicdan platforması”na qoltuta. Bu, Avropa halqları HH asırda yapılğan totalitar rejim aqibetlerini yeñmege ve olarnıñ kelecekte tekrarlanmasına yol qoymaycağına azırlığından delâlet bere. Halqara konferentsiyasınıñ kün tertibine qoyulğan meselelerden biri – “Kommunizm cinayetleri. Neden Avropa er kesten çoq yapmaq borclu?” meselesini ziyade taqdirleyim.

Ukrainadaki vaziyetke ve qırımtatar halqınıñ bugünki alına dair şunı aytmaq isteyim ki, faqat halqara cemiyet, ilk evelâ yigirminci asırda halqlarnıñ sürgünligi ve soyqırımını ketirgen natsizm ve stalin rejimlerini yaşağan, cenk cinayetleri ve insanlıqqa qarşı cinayetlerden zarar körgen Avropa devletleri birleşip, Ukrainağa şu cinayetlerniñ aqibetlerini yeñmege yani qırımtatar halqınıñ öz toprağında aqlarını ğayrıdan tiklemege ve serbest inkişaf etmesinde yardım etecek konkret çare-tedbirlerni almaq imkânını berir.

Faaliyetiñizge teren sayğı-ürmetimni ifade etkenim alda, mahsuldar çalışmañızda başarılar tileyim.

Mustafa Cemilev, Qırımtatar halqı Meclisiniñ
Reisi, Ukraina halq deputatı.