Meclis reisi Mustafa Cemilev Tışqı faaliyet Avropa hızmeti İnsan aqları boyunca departament direktorı Riini Kionki ile körüşti

31 Mayıs 2012

2012 mayıs 31 künü Avropa Birliginiñ Ukrainadaki vekâletliginde Avropa Birliginiñ Ukrainadaki elçisi, Delegatsiyanıñ başı Joze Manuyel Pintu Teyşeranıñ daveti boyunca Qırımtatar halqı Meclisiniñ reisi, Ukraina halq deputatı Mustafa Cemilev Tışqı faaliyet Avropa hızmeti İnsan aqları boyunca departament direktorı Riini Kionki ile.

Elçi Teyşeyra da iştirak etken bu, bir saat devam etken mündericeli körüşüvde R. Kionki hanımnıñ ricasına köre Meclis reisi qırımtatar halqınıñ qaytuvınen bağlı mesele etrafındaki bugünki vaziyetni tafsilâtlı tarif etti. 

Mustafa Cemilev qırımtatarlarnıñ milliy özgünligini saqlap qaluv probleminde ayrıca toqtalıp, bu munasebetnen milliy tasilge qoltutuvnıñ zarurlığını qayd etti. 

İnsan aqları boyunca Departament Direktorı R. Kionki hanımnı ÖBSE qoltutuvında keçirirlmesi planlaştırılğan halqara Forumnı teşkilâtlandıruv ketişatı ve bunıñ kibi de Ukrainanıñ “Milliy mensüpligi boyunca sürgün etilgen şahslarnıñ aqlarını ğayrıdan tiklev aqqında” qanun leyhasınıñ Ukraina parlamentinde baqılması ziyade meraqlandırdı. 

Körüşüv neticeleri boyunca Riini Kionki hanım qırımtatar meselesiniñ böyle tafsilâtlı ve keniş açıqlanğanınen memnünligini bildirip, Ukraina ve Avropa yetekçilerini bu saada haberdar etmek zarurlığını qayd etti ve bu işte faal iştirak etmege azır olğanını da ayttı.