Milliy sınıflarnıñ açıluvı qanun boyunca garntiya etile

31 Mayıs 2012

Saq rayonınıñ Juravli köyündeki umutasil mektepte oqutuv qırımtatar tilinde alıp barılğan 1-nci sınıf 1993 senesi açılğan edi. Al azırda mektepte 4 qırımtatar milliy sınıfı mevcut.  Amma soñki eki sene  devamında evlâdını ana tilinde oqutmağa istegen qırımtatarlar mektep müdirine milliy sınıf açtırıp olamaylar.

     Saq rayonını Juravli köyündeki orta umutasil mektepke  Dolinka,  Listovoye ve mektep yerleşken Juravli köyünde yaşağan balalar qatnaylar. Mektepte  263 talebe  tasil  ala, olarnıñ 127 halqımıznıñ evlâtları. Mektep müdiri Ayşe Bilâlovanıñ bildirgenine köre, mektepte  rus tilinde oqutqan sınıflardan ğayrı,  oqutuv qırımtatar tilinde alıp barılğan 4 sınıf ve  oqutuv ukrain tilinde  alıp barılğan 2 sınıf bar. Keçken sene kibi bu yılı da  milliy  sınıf açmağa çare yoq dep meseleni açıqlay.

  Ayşe Bilâlovanıñ aytqanına köre,  evel  rayon memuriyeti yardım ete edi. Soñki vaqıtta olar tarafından alıp barılğan teşkerüv kösterdi ki – mektepte çalışqan yedi rus ocası öz fenini qırımtatar sınıflarında alıp barıp olamay emiş ve olar fen bergende qullanılacaq terminologik luğat yoqluğını  köstergenler.

  Mektepte bulunğanımızda “Yañı  oquv  yılında  açılacaq  sınıflarda oqutuv 3 qırımtatar, ukrain ve rus tilinde alıp barılğan  sınıflar açılacaq” ilânını körmedik.

 Mektepte ana-babalar teşebbüsi ile keçirilgen körüşüvde Saq regional meclisiniñ reisi Zevcet Kurtumerov, Mitâyevo köy şurası meclisiniñ  reisi  Eldar  Aliyev,  QYUŞ deputatı, Milliy Meclis medeniyet ve tasil idaresiniñ müdiri, “Maarifçi”  birleşmesiniñ  reisi  Safure Kacametova ve  “Maarifçi”  birleşmesi  Teftiş komissiyasınıñ reisi Beyye İlyasova bulundılar.

 Safure  Kacametova    ana-babalarnıñ, müdire ariza almay, degen  ricalarını diqqatqa alıp,  balanıñ Anayasada ve Ukraina   devletiniñ tasilnen bağlı  qanunlarını   añlattı  ve     bu  qanun maddeleri basılğan “Maarif işleri” gazetasını  mektep müdiri ve ana-babalarğa darqattı.

  Milliy ve regional  meclis azaları,    ocalar  ve Qaraqurt (Dolinka) köyüniñ sakinleride öz talaplarını  ayatiy tecribelerine  esaslanıp qoyğanlarını ayttılar.

        Olarnıñ sırasında: Nuri Feratov – üyken oğlu rus tilli sınıfta oqup ana tilini asla bilmegenini,  ortancısı ise milliy sınıfta oqup em til bilgenini, em terbiyeli  olğanını qayd etti. Zarema Feratova  ise Bulğanaq milliy mektepni bitirip, tek faydasını körgenini ve şu sebepten balalarını  milliy sınıfta oqutmağa istegenini ayttı .

  İş bu maqale  azırlanğan vaqıtta  Mitâyevo köy şurası meclisiniñ  reisi  Eldar  Aliyev telefon vastasınen, toplaşuvdan soñ ekinci künü 16 semetdeşmizniñ  – “balamnı oqutuv qırımtatar tilinde alıp barılğan sınıfqa bermege isteyim”,  degen arizası Juravli köy mektebiniñ müdiresine  teslim etilgenini bildirdi.