Sabıq siyasiy mahbüsler ve SSSR em de Poloniyada demokratik areket iştirakçileriniñ beyanatı

20 Mayıs 2012

Rusiyeniñ kelecegine onıñ keçmişi keder ete

2012 senesi mayıs 19

Aqmescit ş. Qırım

Biz, sabıq siyasiy mahbüsler ve SSSR em de Poloniyada demokratik areketniñ iştirakçileri, Rusiyedeki bugünki vaziyetni talil eterkenmiz, cemaatçılıqnıñ diqqatını aşağıdakilerge celp etmekni zarur, dep sayamız. Rusiyede vızlı sürette ta Sovetler Birliginde üküm sürgen avtoritar devlet idaresiniñ usulları qayta doğmaqta. 1993 senesi Anayasada tesis etilgen ve qurulğan demokratik institutlarnıñ maiyeti ayaq astı etilip, aqibette demokratiya degil de SSSR devrindeki “sotsialist demokratiyası”na has taqlid yeñip çıqtı.

Matbuat serbestligi ise açıq ve ya da gizli tsenzura tarafından sıñırlana, miting keçirüv istegi ise polislerniñ zorbalığına oğray, siyasiy reqabetlik küç işletilip basıla, mahkemeler icra akimiyetniñ qolu astında, parlament ve prezident saylavlarında közetilgen sahtekârlıq ise sovet seviyesine yaqınlaşmaqta.

Vicdan mahbüsleriniñ peyda oluvı ise daa bir ve belki de Rusiyede siyasiy vaziyetniñ fenalaşqanını köstergen eñ telükeli belgidir. İnsan aqlarınıñ devamlı şekilde bastırılması totalitar devletniñ meydanğa ketirileyatqanını köstere. Biz yahşı bilemiz ki, bu, kütleviy siyasiy basqılarğa alıp kelir.

Biz Rusiye cemaatçılığını böyle siyasiy stsenariyden qorçalamaq isterdik. Totalitarizmge qaytmaq iç bir şey degil ki, bu iş HH1 asırda nasıl vahşiy bir iş olıp körünmesin. Serbestlikni daima qorçalamaq, şahsiy menfaatlar ve ükümranlıq hastalığına oğrağan siyasetçilerniñ toqunmasından imaye etmek zarur.

Bun munasebetnen biz Rusiye demokratik muhalifetni narazılıq bayraqları altında sovet ve şovinistik küçlerniñ ğayrıdan doğuv telükesine pek diqqatlı olmağa çağıramız. Serbestlikke esaslanğan devlet ve aqlarnıñ musaviyligine esaslanğan demokratiyanıñ bu areketler mevkuresinden iç alâqası olmaz. Olarnen işbirlikte bulunmaq yaqın vaqıtta ağır aqibetlerini kösterir.

Biz Rusiyede grajdan cemiyetiniñ memleketni demokratik inkişaf yoluna qaytaruv oğrundaki areketlerine qoltutqanımız aqqında ilân etemiz. Er birimiz imkânlarımız olğanı qadar bu areketlerge elimizdeki vastalarnen qoltutmaq niyetindemiz.