«Kommunist rejimi tarafından taptalğan aqiqat içün küreşken qırımtatar halqınıñ cesürligini taqdir etemiz»

19 Mayıs 2012

Kommunist rejimi sabıq mahbüsleriniñ “Qırımtatar halqınıñ aqlarını qorçalayıq” muracaatına dissident ve sovet uquqqoruyıcıları Vladimir Bukovskiy, Aleksandr Podrabinek, Natalya Gorbanevskaya, Aleksey Smirnov, Vardan Arutünân, Andrey Grigorenko, Ayşe Seytmuratova, Petr Hleboviç ve Aleksandr Lavut da qoşuldılar.

Bu aqta sovet uquqqoruyıcılarınıñ 2012 senesi mayıs 19-da olıp keçken matbuat konferentsiyasında Natalya Gorbanevskaya bildirdi. Şunı hatırlatmalı ki mayıs 18 künü kommunist rejiminiñ sabıq mahbüsleri İosif Zisels, Miroslav Marinoviç, Vasil Övsiyenko, Zorân Popadük, Yevgen Sverstük, Öles Şevçenko özleriniñ “Qırımtatar halqınıñ aqlarını qorçalayıq” muracaatında Ukraina Kommunist partiyası ve onıñ, Ukraina qanunâratıcı organınıñ minberinden 2012 senesi mayıs 16-da bütün qırımtatar halqını açıqtan-açıq aqaret etken azasını keskin qaralap, insanlıqqa qarşı natsizmnen bir sırada cinayeti içün kommunizmni mahkeme etmekni talap ettiler.

“Sabıq SSSRniñ cezalanğan halqları halqara mahkemege nevbette turalar ve olarnıñ er biriniñ öz davası bar. Kommunist rejimi tarafından taptalğan aqiqatnıñ tiklenilmesi içün küreşken qırımtatar halqınıñ cesürligini tanımalımız”, denile sabıq siyasiy mahbüslerniñ muracaatında.

Belli ki, mayıs 19 künü Aqmescitte SSSRde kommunist rejimine qarşı küreşniñ qarsambalı yollarından keçken sovet siyasiy mahbüsleriniñ körüşüvi olıp keçti.