Valentin Nalivayçenko: Simonenko stalinizm cinayetini aqlağanı içün cinaiy cevapkârlıqqa çekilmeli

16 Mayıs 2012

“Stalin rejimi tarafından 1944 senesi qırımtatarlarnıñ sürgün etilmesi em de-yüre, em de-fakto insanlıqqa qarşı cinayet ve bütün bir halqqa qarşı genotsid aktıdır”, – dedi “Naşa Ukraina” (Bizim Ukraina) partiyası siyasiy keñeşiniñ reisi Valentin Nalivayçenko.

O, hatırlattı ki, stalinizm cinayeti Avropa Şurası Parlament assambleyası ve Avropada telükesizlik ve emekdaşlıq boyunca teşkilâtnıñ qararları ile defalarca qaralanıp, şu eki halqara teşkilâtnıñ azası olğan Ukrainanı da buña mecbur ete..

“Aynı şu sebepke köre men Baş prokurordan Kommunist partiyasınıñ reberi Pötr Simonenkonı parlament minberinden sürgünlikte 46,2 fayızı elâk olğan qırımtatarlarnıñ sürgün etilmesini aqlamaq kibi ayıp areketleri içün cinaiy cevapkârlıqqa çekmesini talap etem, dedi Nalivayçenko.

“Kommunist partiyasınıñ faaliyeti ve Ukrainada totalitar kommunist mevkuresiniñ teşviqatı yasaqlanması kerek. Kommunist partiyası azalarınıñ onlarnen millionlap semetdeşlerimizniñ elâk olmasına sebepçi olğan kommunist rejiminiñ vahşiyane cinayetini aqlap yapqan beyanatları bunıñ içün yeterli esas ola bilir”, – dep qayd etti siyasetçi.

Nalivayçenko Simonenko kibi siyasetçilerniñ yeri Ukraina parlamentinde degil de, Gaaga halqara mahkemesindedir, dey. Bugün anda bösniyalı musulmanlarğa qarşı areketleri içün qabaatlanğan Ratko Mladiçniñ mahkemesi başlandı.

Şunı hatırlatmalı ki, 2012 senesi mayıs 16-da Ukraina Yuqarı Şurası “Milliy mensüpligi boyunca sürgün etilgen şahıslarnıñ aqlarını ğayrıdan tiklev aqqında” qanunnıñ leyhası içün rey berilgende müsbet qarar alıp olamadı.

Ukraina Kommunist partiyası fraktsiyasınıñ deputatları rey berüvde iştirak etmediler, amma bundan evel fraktsiyanıñ başı Pötr Simonenko öz çıqışında qırımtatar halqı sürgünliginiñ aqlı olğanını açıqtan-açıq söyledi.