Belli ukrain dissidenti Leonid Plüşç Sovet uquqqoruyıcılarınıñ halqara konferentsiyasına qoltuta

16 Mayıs 2012

Mustafa Cemilevniñ teşebbüsine qoltutqan, lâkin kendilerine bağlı olmağan sebeplerden ötrü kelip olamağan belli ukrain dissidenti Leonid Plüşç Frenkistandan Qırımdaki tedbirleri iştirakçileriniñ adına mektüp yollağan. 

Aşağıda Leonid Plüşçnıñ mektübini avale etemiz :


 

2012 senesi mayıs 17-18 künleri Qırımda matem mitinginiñ iştirakçilerine

Qıymetli dostlar!

Meni qırımtatar halqı soyqırımı qurbanlarınıñ hatırasına bağışlanıp mayıs 17-18 künleri keçirilecek matem tedbirlerinde iştirak etmek içün davet etken Meclis ve onıñ reisi Mustafa Cemilevge teşekkür bildirmek isteyim.

Halqlarnı sürgün etken sovet kommunist rejimi faşist rejiminen bir. Em de bütün bir halqnı faşistlerge hızmet etkeninde suçlanılması da tesaduf degil. Qırımtatarlar Stalin tarafından Stalinniñ esas cinayetlerinden biri olğan Gitler ile añlaşması içün cezalandılar. Albu ki aynı şu añlaşma 2-nci cian cenkiniñ başlanmasına sebepçi oldı. Aqılğa yatmağan qabaatlanuv aqibetinde bütün bir halq Vatanından mahrum etildi.

.Şimdi, qırımtatarlarnıñ bir qısmı endi Vatanğa qaytıp, resmen demokratik Ukraina çerçivesinde öz muhtariyatını tiklegen bir zamanda men sovet rejiminiñ cenk ve sürgünliknen bağlı daa bir cinayetini hatırlatmaq isterdim. Bu, 1932-33 senelerdeki açlıq, millionlarnen qurbanlarnı alıp ketken ukrain köylüleriniñ soyqırımı. Bu vahşiylik Gitlerniñ ükümet başına keçmesini qolaylaştırdı, kommunistlerniñ cinayetlerine yol açtı. Halqlarnıñ sürgünligi işte şu Açlıqnıñ devamı oldı.

Biz genotsidniñ er angi şekilleri dünya miqyasında qaralanmasına irişmek kerekmiz ki, sessiz seyir etüvimiz başqa cinayetlerniñ başlanmasına siltem ola bilir. Şunıñ içün de 1968 senesi general Grigorenko Aleksey Kösteringe bağışlanğan aqşamda qırımtatarlar ögünde genotsid aqqında halqara qanunlarğa esaslanğanları alda, öz talaplarınen Halqara teşkilâtlarğa muracaat etüv tezisini ortağa qoydı.

Ta o zamanlarda bizim halqlarımız, olsun tek şahıslar arasında, birlikte çalışıp başladılar. Şunıñ içün de Ayşe Seytmuratova Ukraina Helsinki Gruppasınıñ Halqara vekâletligine kirdi.

Qırımtatar vekilleri, bilhassa Zampira Asanovanıñ, Kiyevge kelgenini minnetdarlıq ile hatırlayım. O uzaq yıllarda qırımtatar halqınıñ milliy areketi bizler içün kütleviyligi, umumhalqlığı, nizam-tertipligi, ikmeti, sabır ve aynı zamanda cesürliginen ibret oldı. Rus ve ukrain şovinistlerniñ, Telükesizlik hızmeti casusları, çetelli ekstremistlerniñ fesatlarına baqmadan qırımtatarlar bugün de böyle nümünedirler. Qırımtatarlarnı parçalamaq ıdırınuvları ne Brejnev, ne Gorbaçöv devrinde, ne bugün çul tutmaqta.

Bugün kommunistlerniñ rus şovinizmi ve “qazaq”larğa tatar ekstremizmine qarşı küreş manaçığınen ukrain fesatçıları da qoşulmaqta. Bular tatarlarnıñ vahşiyligi aqqında saçmalavlarnı tarqatıp, muhtariyatnı lâğv ettirmekni teklif eteler. Amma paradoks şunda ki, bugünki Qırım muhtariyatı kerçekten de hasta. Öz vaqtında o öz devletçiligi oğrunda küreşüvi sayesinde, tamır halqnıñ milliy itiyaclarından kelip çıqaraq qurulğan edi. Teessüf ki, ğayrıdan tiklengen muhtariyat Qırımdan sürgün etilgen asıl halq ve diger milletlerniñ aqlarını aslı da tanımay. Şunıñ içün de milliy-territorial devletçilikni talap etüv sürgünlikni soyqırım olaraq tanılması talabınıñ mantıqıy devamıdır.

Şovinist Moskva teşviqatı Çeçenistannen qorquzğanı kibi Qırımnen de qorquza. Lâkin aqiqatta ise ille qırımtatarlar Qırımda barışıqlıqnıñ kefaletidir. Grigorenkonıñ, ğayrıdan quruv devri başındaki “Ruh”nıñ ananeleri, ukrain ve qırımtatar dissident deputatlarınıñ Yuqarı Şurada işbirligi de böyle kefillikni bere. Qırımtatarlarnıñ UPA otrâdlarında iştiraki, bunıñ kibi de 1943 senesi OUN-UPA tarafından eki totalitar rejimge qarşı birleşmek maqsadınen Şarqiy Avropa ve Asiya eziyetlengen halqlar konferentsiyasında delegatsiyasını taqdim etkenlerini hatırlatmaq ister edim.

Şunıñ içün de epimizge Ukrainanı demokratlaştıruv boyunca ameliy işbirlikni başlamaqnı tileyim.

Leonid Plüşç,

sabıq sovet siyasiy mahbüsi, SSSRde ignsan aqlarını qoorçalav teşebbdüsçi gruppası ve Ukraina Helsinki Gruppası Çeteldeki vekâletliginiñ azası

2012 senesi mayıs 15.

Frkenkistan