Türkiyede türk dünyası maarifçileriniñ halqara konferentsiyası keçti

07 Mayıs 2012

Aprel 23-26 künleri  Türkiyeniñ dülber turizm köşelerinden biri,  çam  tavlarında yerleşken   yer tübinden  pışqırıp çıqqan sıcaq termal çoqraqlarınen meşur  Qızılcıhamam  şeerinde   Halqara  tasil hadimleri “Avraziya” federatsiyasınıñ nevbetdegi konferentsiyası olıp keçti. 

Konferentsiyanıñ işinda  Türkiye, Azerbaycan, Bulğaristan, Kosovo,  Şimaliy Qıbrız, Qazahistan, Qırım,  Romaniya, İraq ve Makedoniya ülkelerinde  faaliyet köstergen  maarif hadimleri teşkilâtlarınıñ vekilleri iştirak ettiler. Qırımnı Milliy Meclis medeniyet ve tasil idaresiniñ reberi, “Maarifçi” birleşmesiniñ reisi Safure Kacametova  ve  “Maarifçi” birleşmesiniñ idare azası Zure Pinka temsil ettiler.

Konferentsiyada türk dünyasınıñ maarif birleşmeleri temsilcileri aşğıdaki meseleler boyunca muzakere ettiler: – öz ara alâqalarnıñ şekillenmesi yolunda konkret çalışmalar;- türk dünyasında marif meselelerindeki integratsiyanı  pekitilmesi ve ortaq maqsadlarğa irişilmesi;- bu emekdaşlıq çerçivesinde maarifte milliy usullarnı belgiyev ve tecribe  paylaşuv  ve il. Konferentsiyada   Halqara  tasil hadimleri  “Avraziya” federatsiyasınıñ  reisi Şuaip Özcan ve federatsiyanıñ  teftiş komissiyası  reisi Yaşar Yanıçaroğlunıñ esabat maruzaları diñlenildi. Açıq rey berüv neticesinde bu eki çoq işkir insan  federatsiyanıñ ve teftiş komissiyası  başlıqları olaraq çalışmağa vekâleti 2012-2016 yıllarına  tasdiqlandı ve bu müddetke   Halqara tasil hadimleri  “Avraziya”  federatsiyasınıñ  azaları  tarafından Deklaratsiya imzalandı.

Spravka: “Avraziya” tasil hadimleriniñ federatsiyası 2001 senesi iyün 22-de  Türkiye, Azerbaycan, Qırım, Qazahistan, Qırğızıstan maarif birleşmeleri tarafından teşilâtlandırılğan edi  ve  iş bu ülkelerniñ maarifçileri halqara birleşmeniñ tesisçileri olaraq ilk añlaşmanı imzalağan ediler.  2005 senesi “Avraziya” birleşmesi resmiy Halqara Assotsiyatsiya olaraq tanıldı, 2008 senesi ise Halqara federatsiya olaraq status aldı.