Menu 
HIDIRLEZ – 2012
05 Mayıs 2012
2012 senesi mayıs 5 künü Aqmescit-Bağçasaray yolunıñ 25-nci kilometrinde “Şeherezada” medeniy-eglence merkezi yanındaki tarlada ötkerilgen qırımtatarlarnıñ Bütünqırım Hıdırlez bayramına Qırımnıñ çeşit köşelerinden kelgen 25-30 biñ adam toplandı.
Şunı da qayd etmeli ki, Hıdırlez Qırımda yaşağan çeşit millet vekilleri, Türkiye, Zaporojye, Herson vilâyetleri, Kiyev ve Odessa şeerlerinden kelgen insanlarnı birleştirdi. Bayramnıñ tantanalı açılış merasiminde Qırım musulmanlarınıñ müftisi acı Emirali Ablayev toplanğanlarnı hayırlap, keçmişlerniñ ruhuna ve yılnıñ bereketli olması içün dua oqudı.
Bayram iştirakçilerini bunıñ kibi de Qırımtatar halqı Meclisiniñ reisi Mustafa Cemilev, Bütündünya qırımtatarlar kongressiniñ reisi Refat Çubarov, Türkiye baş nazir reisiniñ muavini Ali Babacan ve Türkiyeniñ Ukrainadaki Toluvekâletli ve Vefqulade Elçisi Mehmet Samsar hayırladılar.
“Tezden mayıs 18 – halqımızğa facia ve azap ketirgen kün yaqınlaşa, – dep başladı öz çıqışını Mustafa Cemilev. – Lâkin ayatta tek qara künler degil de, bayramlar da ola. Bu tabiiydir. Bugün biz mında halqımıznıñ eñ qadimiy bayramlarından biri olğan Hıdırlez bayramını qayd etmek içün toplandıq. Barsın, bu kün dostluq ve birlik bayramı olsun, – dedi Mustafa Cemilev. – Biz öz Vatanımızda öz urf-adetlerimizni ğayrıdan timklemek kerekmiz. Bu sene bayramğa pek çoq adam ve bilhassa çoq genç ve balalar kelgenine sevindim!”.
Halqımıznıñ ananesine köre şu yerde sanada qalaqay tığırtıldı. Bu şerefli vazife Milliy Meclisniñ reisi Mustafa Cemilevge işanıldı. Türkiye baş nazir muavini Ali Babacan bayram iştirakçilerini bütün türk halqı adından selâmladı ve hayırladı.
“Bugün mında toplanırkenmiz, birlik-beraberligimizni ve yarınki künümizge eminligimizni numayış etemiz. Bu bayramnı sizler – güzel Vatanımıznıñ çeşit köşelerinden kelgen, Ukraina vilâyetleri ve şeerleri em de çet devletlerden kelgen musafirler yaraştırdıñız, – dep muracaat etti Refat Çubarov. – Men yerli ve regional meclis, icadiy kollektivlerniñ vekilleri, iş adamları, matbuat vastalarınıñ hadimlerine bayramnı azırlav ve keçirüvge qoşqan isseleri içün teşekkür bildirmek isteyim. Bilem ve eminim ki, eki aftadan soñ mayıs 18 künü Aqmescitniñ merkeziy meydanında biz kene böyle birlikli olup, qırımtatar halqı genotsidiniñ qurbanlarını añarmız, qırımtatar halqı aq-uquqlarınıñ ğayrıdan tiklenilmesini talap etermiz”.
“Menim qıymetli semetdeşlerim, men bugün 1968 senesi Çırçıqta bizler bu bayramımıznı qayd etmek içün toplanğanımızda, bizlerni sopalap, üstümizge suv töküp quvdılar, dep hatırladı milliy areket veteranı Ayşe Seytmuratova. – O zaman biz tasavur bile etmedik ki, kün kelip bayramımıznı tuvğan yurtumızda böyle yüksek seviyede keçirirmiz, dep.
Qararlaştırılğanına köre kün devamında bayram alanında çeşit yarışlar, musabaqa ve kontsertler oldı. Şusı quvançlı ki, Qırımnıñ çeşit rayon ve qasabalarından kelgen delegatsiyalarnıñ erkânında akimiyet organı reberleri ve regional meclis vekilleri da bar edi. Sport yarışlarnıñ neticeleri boyunca ğalipler belgilenip, mahsus mukâfatlarnen taqdirlendiler. At qoşularında yeñgenlerni şahsen Qırım Nazirler Şurasınıñ reisi Anatoliy Mogilöv mukâfatladı.
Ayrı meydançıqlarda genç futbolcılar öz çempionatını keçirdiler. Sıra-sıranen qurulğan çadırlarda halq ustaları öz işlerini numayış ettiler. Milliy yemeklerni belli açşılar taqdim ettiler.
Barışıqlıq temsilleri olğan gögercinlerni kökke uçuruv merasimi bayramğa ayrıca tüs berdi. Öz ana toprağıñda barışıqlıq içersinde yaşamaq bütün halq ve insanlarnıñ eñ birinci istegidir.
