Yalta ve Aluşta regionlarında yerli meclisler saylandı

04 Mayıs 2012

Aluşta regionında aprel 28 künü Aluşta, Büyük-Lambat, Körbekkul ve Küçük-Üzen yerli meclisleriniñ azaları saylandı. Belli ki, mezkür yerli meclisler vekâletliginiñ müddetinden evel bitkeni sebebinden Qırımtatar halqı Meclisiniñ evel alğan qararı boyunca bu memuriy-territorial qurumlarda nevbetten tış saylavlar teşkilâtlandırıldı.

Gizli rey berüv neticelerine köre dört saylav okrugında teşkil etilgen yedi saylav uçastkalarında yerli meclislerge 45 namzetten 32 aza seçildi. Aluşta regionı boyunca saylavcılarnıñ faalligi 45 fayıznı teşkil etip, eñ yüksek aktivlik Quru-Üzende (80%), eñ aşağı ise Şuma (29%) köyünde közetildi.

Yalta regionı yerli meclislerine saylavlar ise aprel 29 künü olıp keçti. Şunı qayd etmeli ki, Yalta regionında yerli meclis azalarınıñ saylavları umumiy musaviy ve doğrudan-doğru seçüv esasında gizli rey berüv yolunen keçirildi.

Alta regionındaki sekiz yerli mecliske azalarnı saylamaq içün 8 okrug ve 11 saylav uçastkaları teşkil etilip, 53 namzet cedvelge alındı. Rey berüv neticelerine köre yerli meclislerge 33 adam saylandı. Şunı aytmaq kerek ki, yerli mecliçslerge aza olaraq saylanmaq içün özlerini milliy idare organlarına muhalif, dep tanığan, cümleden “Milliy Firqa” teşkilâtınıñ vekilleri de öz namzetlerini kösterdiler. Amma saylav neticeleri boyunca olarnıñ iç birisi keçip olamadı. Umumen, Yalta regionı saylavcılarınıñ faalligi 52%, teşkil etip, eñ yüksek faallik Livadiya (89%) qasabasında, eñ aşağı ise Yalta (39%) şeerinde közetildi.