Qırımtatar halqı Meclisiniñ Prezidiumı Yuliya Timoşenkoğa açlıq tutuvnı toqtatmaq ricasınen muracaat ete

04 May 2012

Ürmetli Yuliya Vladimirovna!

Ükümetniñ basqısına narazılıq bildirerek açlıq tutuvıñız neticesinde sağlığıñız keskin fenalaşqanı ve bu siziñ ayatıñıznı telüke altına qoyğanınen Qırımtatar halqı Meclisiniñ azaları ğayet kederlenmekteler. Siziñ tarafıñızdan bu, adaletsizlik ve aqaretlerge qarşı küreşniñ eñ soñki şekili olğanını biz yahşı añlaymız. Bugün bütün demokratik dünya Sizge qoltuta ve Ukrainada muhalifetke qarşı kösterilgen qanunsızlıqnı toqtatmaqnı talap ete.
Ukraina ve ukrain halqınen umumiy keçmişnen ve Ukrainağa Avropa halqları arasında munasip yerni temin etecek demokratiya pekinmesine ümütnen bağlı olğan qırımtatar halqınıñ kelecegi içün Siziñ ayatıñız ve bu ceryanda şahsen Siziñ iştirakiñiz ziyade müimdir.

Şunı da qoşmaq isteymiz ki, qırımtatar halqı SSSR kommunist rejimine qarşı küreşken ağır yıllarda qırımtatar halqı milliy areketiniñ faalleri de apshanelerde aqsızlıq ve repressiyağa narazılığını açlıq tutuvnen numayış etken ediler. Amma açlıq tutqanlar endi ölmek telükesinde olğanda apshane bekçileri olarnıñ vucudını zorbalıqnen mahsus şingenliklernen ğıdalandırdılar.
Sayğılı Yuliya Vladimirovna, Siziñ ağrıñıznı sezerek ve Ukraina içün fedayiligiñizni de añlayaraq şunı qayd etemiz ki, ukrain cemiyeti Siziñ sağ-selâmet olmañızğa muhtacdır.
 Sizge yalvaramız, rica etemiz – açlıq tutmaqnı toqtatıñız.
Ğalebege doğru beraber keteyik!

Ukrainağa şan-şerefler!
Yaşasın qırımtatar halqı!

Qırımtatar halqı Meclisiniñ reisi, Ukraina halq deputatı
Mustafa Cemilev