Keriçte Hıdırlez bayramı

03 Mayıs 2012

Mayıs 2 künü Keriçniñ deñiz yalısında yerleşken istraat bağçasında Hıdırlez bayramı qayd etildi. Bayram aqqında aqqında tafsilâtlı malümatnen Qırımtatar halqı Meclisi reisiniñ birinci muavini Refat Çubarov Facebook sotsial ağlarında öz saifesinde paylaşa.

Şunı qayd etmek kerek ki, dep yaza Refat Çubarov, Keriçte Hıdırlez bayramını tantanalı keçirmek endi umumşeer miqyasında ananege çevirildi. Hıdırlezge şeerniñ başı Öleg Osadçiy, Müfret Veliyev reisligindeki Keriç regional meclisi ve bütün sakinleri kün evelden azırlanalar.

Hıdırlez bayramında iştirak etmek içün Keriç civarındaki köy ve qasabalardan keldiler. Bayram tedbirlerine er kesten ziyade balalar quvana , çünki olar içün bu, üykenler ögünde oynamaq ve yırlamaq ustalıqlarını numayış etmek içün daa bir fursattır.

Refat Çubarovnıñ bildirgenine köre, bayramnıñ resmiy açılışında Keriç şeer golovası Öleg Osadçiy, Bütündünya qırımtatarlar kongressiniñ prezidenti Refat Çubarov ve Keriç regional meclisiniñ reisi Müfret Veliyev iştirak ettiler.

Hıdırlez bayramı çerçivesinde Keriç şeer bayrağı ve qırımtatar milliy bayraqlarınen yaraştırılğan yengil arabalarnıñ yürüşi oldı.

 Amma bayramnı eñ ziyade yaraştırğan ve ayrıca bir keyf bağışlağan şey – bu qırımtatar milliy küreş boyunca yarış oldı. Ğalip ise şeer golovasından bir qoyun qazandı.

Cumhuriyet seviyesinde Hıdırlez bayramı mayıs 5 künü Bağçasaray rayonında “Şaherezada” eglence merkezinde ötkerilecek.
Bayramğa er kes davet etile. Bayram teşkilâtçılarınıñ vade etkenine köre, tedbir pek meraqlı ve şeñ olacaq.