Mustafa Cemilev Aluşta regionı sakinlerinen körüşti

26 Aprel 2012

Belli ki, 2012 senesi aprel 28-de Aluşta regionındaki Aluşta şeer meclisi, Büyük Lambat, Küçük Üzen ve Körbekül yerli meclislerine azalar saylanacaq.

Saylavlar arfesinde Qırımtatar halqı Meclisiniñ reisi, Ukraina halq deputatı Mustafa Cemilev Aluşta regionı sakinlerinen bir çoq körüşüvler keçirdi.

Meclis reisiniñ muavini, yerli meclislerge saylavlarnı azırlav ve teşkilâtlandıruv boyunca komissiya reisi Ahtem Çiygoz, şu komissiya azası Ali Özenbaş, Meclis tışqı alâqalar bölügi başınıñ yardımcısı Abduraman Egiz ve Aluşta “Çatır-Dağ” qırımtatar milliy-medeniy cemiyetniñ başı Seit-Yağya Kazakov da iştirak etken bu toplaşuvlarda Meclis yolbşaçıları ve yerli sakinler Aluşta regionında ve umumen qırımtatar halqınıñ vaziyeti muzakere etildi.

Qırımtatarlarnıñ ayatında öz-özüni idare etüv milliy organlarına olacaq saylavlar kibi mesülietli adımğa azırlıq Aluşta, Büyük Lambat, Körbek, Küçük Üzen ve Şuma köylerinda aprel 21 künü olıp keçken körüşüvlerniñ baş mevzusı oldı. Çünki saylavlarda Aluşta regionı sakinleriniñ milliy menfaatlarını temsil etecek vekiller seçilecek.

Adamlar öz-özüni idare etüv milliy organlarında yerli meclislerniñ vatanperver, faal ve ikmetli vekillerini körmek isteyler.

Bundan da ğayrı, Meclis vekilleri Aluşta regionı sakinlerini qırımtatar halqınıñ Hıdırlez ve genotsid qurbanlarınıñ hatırasına matem merasimleri kibi Bütün Qırım seviyesinde öltkerilgen kütleviy tedbirlerde iştirak etmege çağırdılar.