Meclis reisi Mustafa Cemilev Türkiye parlament delegatsiyasınen körüşti

25 Aprel 2012

2012 senesi aprel 24 künü Kiyevde Türkiyeniñ Ukrainadaki elçihanesinde Qırımtatar halqı Meclisiniñ reisi, Ukraina halq deputatı Mustafa Cemilev Türkiye Büyük Milliy Meclis tışqı işler komissiyasınıñ reisi Volkan Bozkır yolbaşçılığında Türkiye parlament delegatsiyası azalarınen körüşti. 

Türkiye parlament vekilleri Ukrainağa Yuqarı Şura reisi Vladimir Litvinniñ resmiy daveti boyunca Ukraina ve Türkiye arasındaki parlament alâqalarını pekitmek maqsadınen keldiler. Körüşüvde Türkiyeniñ Ukrainada Vefqulade ve Tolu vekâletli elçisi Mehmet Samsar da iştirak etti. 

Volkan Bozkır Meclis reisine Ukraina parlamentiniñ reisi Vladimir Litvin, Yuqarı Tışqı işler boyunca komitet reisi Öleg Belorus ve onıñ muavini Leonid Kojara ile körüşüvlerniñ neticeleri aqqında aytıp, körüşüvler devamında qırımtatarlarnıñ Ukrainada aq-uquqlarını ğayrıdan tiklevnen bağlı meseleler, bunıñ kibi de Ukrainanıñ “Milliy mensüpligine köre sürgün etilgen şahıslarnıñ aqlarını ğayrıdan tiklev aqqında”ki Qanun leyhasını qabul etilüvi istiqballeri muzakere etilgenini qayd etti. 

Körüşüv devamında taraflar Türkiye başbaqan muavini Bekir Bozdağ yolbaşçılığında Türkiye iş daireleri delegatsiyasınıñ Ukraina ve Qırımğa ziyareti programmasını tafsilâtlı muzakere ettiler. 

Şunı da hatırlatmalı ki, Qırım delegatsiyasınıñ Türkiyege 2012 senesi aprel 17 ziyareti neticeleri boyunca 2012 senesi mayıs 5-te Kiyevde Türkiye ve Ukraina iş daireleri vekilleriniñ körüşüvini keçirmek kelişilgen edi. Ziyaret çerçivesinde Qırımğa ziyaret de planlaştırıldı.