Refat Çubarov: «Bizim küçümiz – birlikte»

24 Aprel 2012

2012 senesi aprel 23 künü Aqmescit şeeriniñ Kiyev rayon mahkemesinde R. Balbekniñ Qırımtatar halqı Meclisiniñ reisi, Ukraina halq deputatı Mustafa Cemilev, “Den” ukrain ve “Avdet” qırımtatar gazetalarına nisbeten “Namus, şeref ve iş namını qorçalav ve aqiqatqa uymağan malümatlar reddiyesi aqqında” davasınıñ muzakeresi başlandı.

Birinci sefer olğanı kibi bu keresinde de Aqmescit şeeri Kiyev rayon mahkemesiniñ akemi A.D. Didenko reisligindeki açıq mahkemege Ruslan Balbek kelmeyip, onıñ menfaatlarını advokat Aleksandr Zadkov temsil etti.

Olıp keçken mahkemelerden bu birincisi edi ki, angisinde eki tarafnıñ da temsilcileri arizalarını taqdim ettiler ve nevbetteki diñlevlerge şaatlar belgilendi.

Mustafa Cemilevniñ advokatı Hatice Mamutova şaat olaraq Qırımtatar halqı Meclisi reisiniñ birinci muavini Refat Çubarov davet etilmesi boyunca ariza berdi. Balbekniñ vekili Aleksandr Zadkov ise mahkemege şaat olaraq Enver Ametov, Kamil Ametov, Murat Voyennıy, Timur Dağcı ve Rustem Suleymanovnı davet etip, davacı nasıl maneviy eziyet çekkeni ve bunıñ aqibetleri aqqında aytacaqlarını, Meclis reisi Mustafa Cemilevge nasıl qıymet keseceklerini diñlemekni teklif etti. Mahkeme binası ögünde tışta ise mahkeme ketişatınen meraqlanğan yüzlernen qırımtatarlar toplandılar.

Diñlevden soñ Meclis Kâtibiyetiniñ yolbaşçısı Zair Smedlâyev toplanğanlarğa mahkeme ketişatı aqqında ve kelecek diñlevler mayıs 23 künü saat 9.30-da olacağını haber etti.

Soñra toplanğanlarğa Meclis reisiniñ muavini Ahtem Çiygoz hıtap etip, özlerini qırımtatar degen insanlarnıñ areketleri halqnı bölmekke doğrultılğandır, dedi. “Eger olar mayıs 23 künü bugünkisinden azca adam toplanır, dep belleseler, yañılalar. Aceba, ne sebepten mahkeme ep sozula. Bu fesat ep surat almaqta”, – dedi A. Çiygoz.

Meclis reisiniñ birinci muavini Refat Çubarov bu iş boyunca nevbetteki muzakereniñ müddeti nafile o künge belgilenmegeni, er şey mayıs 18 tedbirleri ne derecede teşkilâtlı ve birlikli keçecegine bağlı olğanını añlattı. “Olarnıñ tarafından halqımıznı bölmek areketleri boşqa çıqar. Biz birligimizni daa da pekitmelimiz, bizim küçümiz tek birlikte”, – dedi Refat Çubarov.

Toplanğanlarnıñ episi kelecek mahkemede de ve matem tedbirlerinde de mıtlaqa iştirak eteceklerini bildirdiler.