«AKÇURA» cemiyeti 15 yaşında!

23 Aprel 2012

2012 senesi aprel 22 künü Bütündünya qırımtatarlar kongressiniñ prezidenti Refat Çubarov ve Qırımtatar halqı Meclisiniñ azaları Ali Hamzin ve Zaur Smirnov Volgaboyu, Ural ve Sibir tatarlarınıñ “AKÇURA” cemiyeti faaliyetiniñ 15 yıllığına bağışlanğan yubiley tedbirinde iştirak ettiler. Cemiyetke Volgaboyu tatarlar diasporasınıñ faali Raisa Münirovna Alekseyeva yetekçilik yapa.

Bu müim vaqianı qayd etmek içün Qazandan Bütündünya tatarlar kongressi İcra komitetiniñ çeteldeki teşkilâtlarnen çalışuv bölüginiñ başı
Lenara Küteyeva, “Tatar ailesi” Bütünrusiye Cemaat fondı idaresiniñ reisi Milâuşa Gayfullina, “Tatarstan- Yañı Asır” (TNV) telekanalında “Tatarlar” yayınınıñ müellifi ve alıp barıcısı Flüra Abdullina, Qırımda Volgaboyu tatarlarınıñ “İdel” cumhuriyet teşkilâtınıñ reisi İlmir Temirgaliyev ve digerleri keldiler.

“AKÇURA” cemiyeti yarımadada milletlerara barışıqlıqnıñ pekinmesine büyük isse qoşa ve bu saada faal areketlerde buluna. Volgaboyu, Ural ve Sibir tatarlarınıñ Yaltadaki “AKÇURA” cemiyeti Qırımda Tatarstan künlerini keçirip, bu bayramda qırımtatar icadiy birleşmelerniñ vekilleri de aktiv iştirak eteler.

Tatarstan devlet bayrağı ve qırımtatar milliy bayrağınen yaraştırılğan sanada yubiley merasimi iştirakçileriniñ ögünde “AKÇORA” taqımı kontsert numayış etti. Em büyük yaşta adamlarnı , em gençlerni birleştirgen bu taqım tedbirge kelgenlerge bayram keyfini bağışladı. Bilhassa Abdulla Tuqaynıñ “Ey tugan tel, ey matur tel” şiiri eñ çoq elçırpmalarnı qazandı. .

Yubiley tedbiri iştirakçileri ögünde çıqışta Refat Çubarov Volgaboyu tatarlar cemiyetiniñ aktiv faaliyeti, hususan milliy özgünlikni, tuvğan til ve medeniyetni qorçalavdaki areketlerini ayrıca qayd etti. “Qırımtatar halqınıñ Meclisi qırımtatarlar Vatanğa qaytqanlarınen ilk-evelâ sürgünlik devrinde Qazan ve Qırım arasında üzülgen bağnı ğayrıdan tiklemege kirişti. Çünki biri-birilerine bu qadar yaqın halqlar biri-birilerinden uzaq olamazlar”, – dedi Refat Çubarov.

Tedbir devamında Refat Çubarov, İlmir Temirgaliyev, Ali Hamzin ve Zaur Smirnov Bütündünya tatarlar kongressi İcra komitetiniñ çeteldeki teşkilâtlarnen çalışuv bölüginiñ başı Lenara Küteyeva ile subetleşip, kelecekte işbirlik qurmaq hususında fikir paylaştılar.