Qırımtatar ziyalıları Mustafa Cemilevni mukâfatınen hayırladılar

20 Aprel 2012

2012 senesi aprel 19 künü Meclis ofisinde Qırımtatar halqı Meclisiniñ reisi Mustafa Cemilev onı mukâfat ile hayırlamağa kelgen qırımtatar ziyalılarınen körüşti.

Körüşüvni Meclisniñ Medeniyet ve tasil idaresiniñ başı Safure Kacametova teşkilâtlandırdı.

Mustafa Cemilevni hayırlamaq içün İ. Gasprinskiy adına qırımtatar kütüphanesiniñ müdiri Gülnara Yağyayeva ve onıñ muavini Leylâ Qadırova, Qırımtatar sanat müzeyiniñ direktorı Safiye Eminova ve onıñ muavini Nuriye Gemici, “Qırım” ve “Yañı dünya” gazetalarınıñ baş muarrirleri Bekir Mamutov ve Enver İbraimov, Qırımda hızmet köstergen artist Rustem Memetov, “Krım” DTRK qırımtatar tilinde programmalar birleşmesiniñ direktorı Seyitislâm Kişveyev, Qırım Tail ve ilim, sport ve gençlik nazirligi qırımtatarlar tilinde tasil sektorınıñ müdiri Zarema Suleymanova ve TMU qırımtatar edebiyatı kafedrasınıñ müdiri, dotsent Şevket Yunusov keldiler.

“Bundan 100 yıl evelsi türk dünyasınıñ ulu mütefekkiri, milletimizniñ atası İsmail Gasprinskiy tarafından tesis etilgen bu “Türk Ocakları” mukâfatına aynı siz, halqımıznıñ yetekçisi, nail olğanıñız büyük emiyetke maliktir.

Biz sizni siyasiy meydanda daa çoq yıllar körmekni isteymiz ve daa çoqtan-çoq halqara mukâfatlarnı qazanmañıznı tileymiz”, – dedi öz çıqışında Safure Kacametova. Körüşüvde Qırımtatar halqı Meclisi reisiniñ muavini Refat Çubarov, Qurultay Teftiş komissiyası reisiniñ vazifesini eda etici Qurtseit Abdullayev, “FOND “KRIM” hayriye teşkilâtınıñ başı Riza Şevqiyev iştirak ettiler.

Malümat içün:

2012 senesi aprel 18 künü Qırım türkleri medeniyet ve yardımlaşuv derneginiñ Anqaradaki umumiy merkezi reisiniñ muavini Murtaza Essenkal Meclis reisi Mustafa Cemilevge Ğalip Erden adına “Türk Ocakları” mukâfatını taqdim etti.

Belli ki, Mustafa Cemilev ve türkşınas professor Cevat Heyyetni (İran) mezkür mukâfatnen taqdirlev aqqında qarar “Türk ocaqları”nıñ bu sene aprel 14-te Anqarada Medeniyet ve turizm nazirliginiñ sarayında olıp keçken 42-nci qurultayında ilân etilgen