«Teselli» Türkiyege yol aldı

17 Aprel 2012

Er sene aprel 23 künü Türkiye “Çocuq bayramı”nı qayd ete. Türkiyeniñ büyük şeerlerinde işbu bayramğa bağışlanıp türlü medeniy tedbirler keçirile.

Keçken sene bu bayramnıñ çerçivesinde Qocaeli şeerinde halqara bala festivali teşkil etilgen edi.

Milliy Meclisniñ medeniyet ve tasil idaresi ve ATR telekompaniyası tarafından “Tatlı ses” yarışınıñ ğalipleri festivalge barğan ediler.

Bu sene ise”Teselli” halq balalar ve ösmürler ansambli 20 yıllıq yubileyini qayd etkeni munasebeti ile, Milliy Meclisniñ medeniyet ve tasil idaresi olarnı rağbetlendirmek maqsadınen, festivalge yollamağa qarar alıp, eki ay devamında balalarnı festivalge azırladılar. Festival aprel 17-24 künleri ötkerilecek.

Bayramda “Teselli” ansambliniñ orta gruppası qırımtatar halqınıñ dülber oyun programmasınen er kesni hoşnut etip, alğışlar qazanır, degen ümüttemiz.

Qırım vekilleri öz icadını “Yeşil ada – Qırım” şiarı altınında numayış etecekler.

Ansamblniñ reberleri: Ukrainada ve Tatarstanda nam qazanğan sanaat erbabı Server Kakura, Ukrainada nam qazanğan artist Münir Ablayev ve horeograf Gülnara Egizova.

Oğurlı yollar, “Teselli”!