Aqmescit regionı yerli meclisleri reisleriniñ toplaşuvı

16 Aprel 2012

2012 senesi aprel 16 Aqmescit regionı yerli meclisleriniñ yañı saylanğan reisleriniñ toplaşuvı olıp keçti.

Qırımtatar halqı meclisi reisiniñ muavini, Meclisniñ Regional ve yerli meclisler faaliyetini yönetüv idaresiniñ başı Ahtem Çiygoz alıp barğan bu toplaşuvda bunıñ kibi de Meclis azaları Fevzi Qubedinov, İslâm Halilov, Ruslan Ennanov ve Lemmar Yunusov iştirak ettiler.

Toplaşuv kün tertibine Bütünqırım Hıdırlez bayramına ve 1944 senesi mayıs 18 sürgünligi ve ğurbette zorluq ile yaşav qurbanlarınıñ hatırasına bağışlanğan matem merasimlerine azırlıqnen bağlı meseleler kirsetildi.

Aqmescit regionı yerli meclisleriniñ yañı saylanğan reisleriniñ toplaşuvını açaraq Qırımtatar halqı meclisi reisiniñ muavini, Meclisniñ Regional ve yerli meclisler faaliyetini yönetüv idaresiniñ başı Ahtem Çiygoz reislerni saylanğanlarınen hayırladı ve “yerli meclislerniñ erkânına doğrudan-doğru ve gizli rey berüv yolunen saylanğan yañı adamlarnıñ kelmesinen epimiz içün büyük ve müim olğan bu regionda qırımtatarlarnıñ siyasiy-içtimaiy faalligini daa da artqanınıñ şaatları olurmız”, dep ümüt bildirdi.

Toplaşuvda çıqışta bulunğanlar bir qaç aftadan Bütünqırım Hıdırlez bayramına ve 1944 senesi mayıs 18 sürgünligi ve ğurbette zorluq ile yaşav qurbanlarınıñ hatırasına bağışlanğan matem merasimlerini keçirüv Aqmescit regionı yerli meclisleriniñ yañı saylanğan reisleri içün özüne has bir “sınav” olacağını qayd ettiler.

Toplaşuv iştirakçileri bu tedbirlerniñ emiyetini ayrıca qayd etip, qırımtatar halqınıñ tarihı em facialı, em şanlı ve quvançlı vaqialardan toqulğanını ayttılar. Yaş nesilniñ vazifesi Qırımnıñ tamır halqınıñ özgünligini qorçalamaq, keçmişni unutmamaqtır. “Hıdırlez bayramınıñ keçirilmesi halqımıznıñ maneviy ve medeniy ğayrıdan tiklenmesine hızmet etecegi şübesiz. Mayıs 18-de matem tedbirlerni qırımtatar halqı genotsidi qurbanlarınıñ hatırasını añmaq ise yalıñız faciamız aqqında aytmaqnen sıñırlanmadan, halqımız aq-uquqlarınıñ ğayrıdan tiklenmesini talap etmek içün de zarurdır”, – degen fikirni bildirdi toplaşuv iştirakçileri.

Bundan da ğayrı, toplaşuvda mayıs 18 künü Bütünqırım matem mitingi iştirakçileriniñ yürüş marşrutları, mitingde biñlernen semetdeşlerimizniñ iştirakini teminleycek bir sıra teşkiliy tedbirler de muzakere etildi. Toplaşuv soñunda Aqmescit regionı yerli meclisleriniñ yañı saylanğan reisleri mayıs 12-de ötkerilecek Aqmescit regional konferentsiyağa qadar yerli meclislerniñ iş tertibini de añlaştılar.

Malümat içün:

Belli ki, Aqmescit ş. ve Aqmescit rayonı yerli meclislerine azalarnı saylavlar 2012 senesi mart 31-de olıp keçti. Saylavlardan soñ beş kün devamında yañı saylanğan meclisler öz erkânlarından reis, reis muavini ve kâtiplerni sayladılar. “Qırımtatar halqı öz-özüni idare etüv milliy organları aqqında nizamname”ge muvafıq yerli meclislerniñ reisleri aynı zamanda regional meclis azaları da olaraq sayılalar. Regional meclis erkânı ve reis regional konferentsiyalarda yerli meclisleriniñ cemi azaları iştirakinde tekmillene ve saylana.

Qırımtatar halqı Meclisiniñ 2012 senesi aprel 15 qararına binaen 2012 senesi mayıs 12-de olacaq Aqmescit regional konferentsiyada Aqmescit regionı meclisiniñ erkânını tasdiqlanıp, onıñ reisi saylanacaq.