Parlament Ukraina Yuqarı Şurasınıñ İnsan aqları boyunca yañı vekilini saylay

12 Aprel 2012

Malüm olğanına köre, Ukraina Yuqarı Şurasınıñ İnsan aqları boyunca şimdiki vekili Nina Karpaçöva vekâletliginiñ müddeti bitkeni sebebinden devletniñ yuqarı qanunâratıcı organında İnsan aqları boyunca yañı vekilini saylav meselesi muzakere etile.

Bu vazifege namzetlerini köstergen insanlar boyunca fikirlerni şekillendirmek, bunıñ kibi de sürgünlikte qaytıp keleyatqan qırımtatar halqınıñ avdeti ve yerleşüvinen bağlı meseleler çeziminiñ ketişatı aqqında malümat bermek içün Ukraina halq deputatı, Qırımtatar halqı Meclisiniñ reisi Mustafa Cemilev bir sıra körüşüvlerni keçirdi. İşte, o, bu vazifege namzetini köstergen Yevgeniy Zaharov ve Valeriya Lutkovskayanen, Ukraina Yuqarı Şurasınıñ İnsan aqları boyunca şimdiki vekili Nina Karpaçövanen de körüşti.

Körüşüvler devamında Mustafa Cemilev namzetlerniñ Ukrainada insan aq-uquqlarını qorçalav ve sürgün etilgenlerniñ aqlarını imaye etüv işlerinde Vekilniñ rolüni yükseltüvge munasebetlerinen meraqlandı. Meclis reisi şunı da ayrıca qayd etti ki, şahsen kendisi Vekillikke o ya da bu namzetke onıñ sürgünlikten qaytqan qırımtatar halqı ve diger millet vekilleriniñ meselelerini çezüv maqsadınen olacaq Halqara Forumğa munasebetine köre qoltutacaq.

Kesen-kes qararnı devlet parlamenti kelecek afta qabul etecek. Şunı qayd etmeli ki, 2012 senesi aprel 11-de Ukraina Yuqarı Şurası İnsan uquqları ve milliy azlıqlar em de milletlerara munasebetler boyunca komitet öz toplaşuvında Vekilni saylav meselesini baqıp, bu vazifege alternativasız kösterilgen Valeriya Lutkovskayanıñ namzetine qoltutmamaq qararına keldi.