Mustafa Cemilev Kiyev Patrikligi Ukrain Pravoslav Kilsesiniñ qurulmasına qoltuta

06 Aprel 2012

Qırımtatar halqı Meclisiniñ reisi, Ukraina halq deputatı Mustafa Cemilev Ukraina Yuqarı Radası İnsan aqları, milliy azlaıqlar ve milletlerara munasebetlerniñ meseleleri boyunca komiteti Ukraina Prezidenti Viktor Yanukoviçke Kiyev Patrikligi Ukrain Pravoslav Kilsesiniñ quruluvı boyunca muracaat etmek teşebbüsinen çıqtı.

Aqmescit şeerinde Kiyev Patrikligi Ukrain Pravoslav Kilsesiniñ qurucılığı içün yer ayırılmasınen bağlı problemler qayd etilgen Muracaatta denile ki, “Qurtarıcı Hristos ibadethanesi” kilsesini Kiyevskaya soqağında yani Ukrain gimnaziyası yanındaki yerde qurmaq qararlaştırılğan edi. Plan boyunca kilse Qırımda Ukrain cemaatçılığınıñ diniy merkezi olacağı közde tutula.

“İbadethane leyhası, leyha-smeta vesiqalarınıñ azırlanılmasına bütün Ukraina sakinlerinden toplanğan çoq para sarf etildi, – denile muracaatta. – Buña baqmadan 2012 senesi yanvar 16-da Aqmescit şeer şurası topraq damartısını ayırmamaq qararını tasdiqladı”.

“Menfiy qarar, – devam ete muracaat müellifi, komitet reisi, Ukraina halq deputatı Öleg Zarubinskiy cemaatta qızğınlıqnıñ qozğalmasına sebepçi olaraq, Qırımda etnik-diniy vaziyetniñ kerginleşmesine ketire bilir”.

Ukraina Yuqarı Radası İnsan aqları, milliy azlıqlar ve milletlerara munasebetlerniñ meseleleri boyunca komitet Ukraina Prezidentine Qırımdaki Daimiy temsilcisine Kilseler keñeşini meydanğa ketirmekni avale etmek ricasınen muracaatta bulundı.

Mezkür keñeş konsultativ organ vazifesini eda eterek, milletlerara ve dinlerara davanıñ ögüni almaq, regionda stabillikni saqlamaq oğrunda faaliyet kösterir.

Aqmescit ve Qırım Arhiyepiskopı Kliment de Aqmescit şeer şurasınıñ kilse qurucılığı içün yer ayırmamaq qararını böyle izaatladı: “Men Aqmescitte Kiyev Patrikligi Ukrain Pravoslav Kilsesiniñ quruluvı meselesinde bizge qoltutqan Qırımtatar halqı Meclisiniñ reisi, Ukraina halq deputatı Mustafa Cemilevge ğayet minnetdarım, – dey Aqmescit ve Qırım Arhiyepiskopı Kliment. Bizim kilsemiz ve Qırım musulmanlarınıñ müftiligi çeşit din vekilleriniñ itiyac ve aqlarına muqaytlıqnen yanaşıp, kündelik meselelerimizni çezüvde biri-birimizge qoltutamız, aramızda eyi ve özara işanç munasebetler şekillendi. Qırımda Büyük Cuma cami qurucılığı içün yer ayıruv meselesinde zorluq çıqqanda Kiyev patrikligi Ukrain pravoslav kilsesiniñ Qırım bölügi qırımtatar halqı, musulmanlarnıñ areketlerine qoltuttı. Şimdi ise biz yardımğa muhtac olğanımızda, qırımtatarlar da bizge ellerini uzattılar. Mustafa Cemilevniñ teşebbüsinen devlet yolbaşçısına böyle kibi muracaatnen çıqılması biz içün büyük maneviy yardımdır. Bizim kilsemiz de Viktor Yanukoviçke muracaat etti. Ümüt etem ki, tez arada bu problem müsbet çezilir”.