Sürgünlik qurbanlarınıñ hatıra künü tedbirlerini azırlav ve keçirüv boyunca komitetniñ toplaşuvı

05 Aprel 2012

Qırım Muhtar Cumhuriyeti Nazirler Şurasınıñ 2012 senesi fevral 28-de qabul etilgen “Qırımdan sürgün etilüv qurbanlarınıñ hatıra künü tedbirleri aqqında” № 102-r qararına muvafıq 2012 senesi aprel 4 künü Qırım Nazirler Şurasında Qırımdan sürgün etilüv qurbanlarınıñ hatıra kününe tedbirlerni azırlav ve keçirüv boyunca teşkiliy komitetniñ birinci toplaşuvı ötkerildi.

Toplaşuvnı Qırım Muhtar Cumhuriyeti Nazirler Şurası reisiniñ muavini, Teşkiliy komitet reisiniñ muavini Aziz Abdullayev alıp bardı.

Qırımtatar halqı Meclisiniñ reisi, Ukraina halq deputatı Mustafa Cemilev, onıñ birinci muavini, Meclis Kâtibiyetiniñ başı Zair Smedlâyev, QMPU rektorı, professor Fevzi Yaqubov ve komitetniñ diger azaları iştirakinde keçken toplaşuvda bir sıra cumhuriyet nazirlikleri ve idareler yolbaşçılarınıñ Sürgünlik qurbanlarınıñ hatıra künü tedbirlerini azırlav ve keçirüv boyunca yapqan işleri aqqında esabatları diñlenildi.

Cümleden Cumhuriyet İnformatsiya komiteti reisiniñ birinci muavini Şevket Memetov ve Cumhuriyet Milletler komitetiniñ reisi Edem Dudakov QMC icra organlarınıñ bu saadaki faaliyetlerini teminlev ve matbuatta aydınlatuv aqqında bildirdiler. “Sürgünlik qurbanlarınıñ hatıra kününe bir sıra televizion yayınlar ve bunıñ kibi de 2012 senesi mayıs 17-18 hatıra tedbirlerini canlı şekilde aydınlatmaq planlaştırıla”, – dedi Şevket Memetov.

Edem Dudakovnıñ bildirgenine köre, tedbirler planı çerçivesinde qırımtatar halqı sürgünliginiñ qurbanları hatırasına rekviyem aqşamı, “Qalbiñde ateş yaq” gençler aktsiyası, Qırımtatar teatrinde edebiy-bediiy programma keçirilecek.

“1944 senesi mayıs 18 sürgünligi ve on yıllar devamında ğurbet ilde yaşamaq zoruna qalğan qırımtatar halqı qurbanlarınıñ hatırasına Qırımtatar halqı Meclisi ile birlikte Bütünqırım matem mitingini keçirüvniñ tafsilâtlı planı azırlanacaq”, – dedi Qırım Muhtar Cumhuriyeti Nazirler Şurası reisiniñ muavini, Teşkiliy komitet reisiniñ muavini Aziz Abdullayev.

Toplaşuvnıñ iştirakçileri bunıñ kibi de kütleviy tedbirler keçirilgen yerlerde tertip-nizamğa riayet etilmesi ve Bütünqırım matem mitingi iştirakçileri yürgen yollarda havfsızlıqnı teminlev zarurlığını qayd ettiler.

Hatıra tedbirleri planını muzakere etüv devamında Qırımtatar halqı Meclisiniñ reisi, Ukraina halq deputatı Mustafa Cemilev Ukraina Prezidenti ve Ukraina Yuqarı Şurası adına “Sürgünlik qurbanlarınıñ hatıra künü tedbirlerini azırlav ve keçirüv boyunca komitetniñ muracaatı”nı azırlap, 2012 senesi mayıs 18-ge qadar “Milliy mensüpligi boyunca sürgün etilgen şahıslarnıñ uquqlarını ğayrıdan tiklev aqqında” Qanunnıñ leyhası baqılmasını talap etmekni teklif etti.

Teşkiliy komitet azaları Meclis reisiniñ teklifine qoltutıp, mezkür Muracaat Qırımdan sürgün etilüv qurbanlarınıñ hatıra kününe tedbirlerni azırlav ve keçirüv boyunca teşkiliy komitetniñ reisi Qırım Nazirler Şurasınıñ reisi Anatoliy Mogilöv tarafından imzalanmaq kerekligini qayd ettiler.