Bekir Mamutov: «Qırımtatar milliy matbuat künü er yerde ve resmiy seviyede qayd etilmeli»

05 Aprel 2012

Aprel 10 künü tek qırımtatarlar içün degil de, belki de bütün türk-musulman dünyası içün emiyetli bir kündir, Aynı şu künü 1883 senesi “Terciman” gazetasınıñ birinci sanı çqtı.

Soñki bir qaç yıl devamında Bağçasarayda İsmail Gasprinskiy müzeyinde qırımtatar jurnalistleri ve naşirleriniñ körüşüvleri keçirilip, şularnıñ birinde aprel 10 kününi qırımtatar milliy matbuatı künü, dep saymaq qararı alındı. Nevbetteki körüşüv arfesinde olacaq tedbirler ve aprel 10-nı Qırımtatar milliy matbuat künü olaraq belgilemek aqqında Qırımtatar halqı Meclisi prezidiumınıñ azası, “Qırım” gazetasınıñ baş muarriri Bekir Mamutov ikâye ete.

“İsmail Gasprinskiy tesis etken ve 30 yıldan ziyade muarrirligi altında çıqqan Terciman” gazetası birinci sanı dünya yüzüni körgen künde qırımtatar gazetacıları, naşirleri ve jurnalistleri ulu mütefekkirimiz öz gazetasını neşirge azırlağan evde (bugün bu müzey) toplanacaqlar, – dedi B. Mamutov.

Belli ki, “Tercman” gazetası Rusiye imperiyasınıñ topraqlarında yaşağan türkiy halqlarnıñ uyanmasında büyük hızmette bulundı. Lâkin gazeta imperiya sıñırlarından da çıqıp, ta Britaniyağa ait Kalkuttağa qadar darqaldı. Söz sırası, Orta Asiyada özbek tilinde gazeta 1883 senesinden çerik asır keçken soñ çıqıp başladı. “Eki yıl evelsi böyle körüşüvlerniñ birindi aprel 10-nı qırımtatar milliy matbuat künü olaraq qayd etmek qararlaştırıldı. 2011 senesi bu teklif maqullendi. – devam ete Bekir Mamutov. – V Qurultaynıñ nevbetteki sessiyasına qararnıñ leyhası azırlanıp, qırımtatar halqınıñ vekâletli organı tarafından tasdiqlanacaq. Bu emiyetli vaqia er yerde ve resmiy seviyede qayd etilmesi zarur”

Bağçasarayda qırımtatar jurnalistleri körüşüviniñ teşebbüsçilerinden biri şunı da qayd etti ki, milliy matbuatnıñ tecribeli hadimleri yaş nesilni zamanğa uymaq, milliy matbuatnıñ eñ yahşı ananelerini devam ettirmege celp etmeliler

“İ. Gasprinskiy müzeyiniñ müdiri Yaqub Appazovğa teşekkürlerimiz ayrıca, – dedi “Qırım” gazetasınıñ baş muarriri, –bu adam şu tedbirge pek azırlana, mahsuldar çalışmamız içün bütün şaraitlerni teminley”.

Bekir Mamutovnıñ bildirgenine köre, aprel 10 gazetalar neşirge azırlanğan künge doğru kelgeni sebebinden bu sene körüşüv aprel 10-da degil de, 14-nde keçecek ki, körüşüvde bütün jurnalistler iştirak ete bilsin.