Qırımtatar halqı Meclisiniñ Saraylı-Qıyat köy mezarlığında vahşiylik boyunca beyanatı

23 Mart 2012

Qırımda kene vahşiylik yapıldı – mart 20-ge keçer gecesi Aqmescit rayonı Saraylı-Qıyat köyündeki musulman mezarlığında belgilenmegen şahıslar baştaşlar ve qabirlerni aqaret ettiler.

Vandallarnıñ yapqan vahşiyligi aqibetinde Gülsum Mametniñ baştaşı darma-dağın etilgen. Seithalil Amet oğlunıñ baştaşı parlanğan, daa eki baştaşlarda ise ayaqqap izleri qalğan. Bundan ğayrı daa eki qabirni avtomobil basıp keçken.

2012 senesi mart 21 künü Ukraina İçki İşler Nazirliginiñ Qırımdaki Baş idaresi Aqmescit rayon bölügi mezarlıqta vandallıq yapqanı şübe altında alınğan şahıs tapılıp, militsiya bölügine ketirilgeni ve sorğu etilgenini ilân etti.

Ukraina İçki İşler Nazirliginiñ Qırımdaki Baş idaresiniñ resmiy saifesinde bildirilgenine köre, şübeli insan ( Saraylı-Qıyat köyüniñ 1979 sene doğumlı sakini) öz areketini böyle añlatqan: “mart 20 künü mezarlıqqa aqrabasınıñ qabirini ziyaret etmege barğan. Mezarlıqqa kirgende yol çamurlı olğanı sebebinden avtomobil çetke sapqan ve neticede bir qaç baştaş zararlanğan. Bundan soñ maşina tayğan ve bir baştaşqa çarpıp, onı çatlatqan.

Bu vaziyetten öz başına çıqıp olamaycağını añlağan soñ grajdanin yanından keçeyatqan “Cip” avtomobiliniñ aydavcısına yardım sorap muracaat ete. Böyleliknen avtomobilni çamur içinden çıqara. Avtomobil saibi öz qabaatını boynuna alıp, militsiya hadimlerine bu işni eñqasstan yapmağanını añlattı. Baştaşlar onıñ qolaysız areketleriniñ neticesidir”.

Militsiya organları şübe altındaki insannıñ añlatqanları kerçek olğanında cemaatnı qandırmağa tırışqanları iç bir qalıpqa sığmay. Taqiqatçılar parlanmağan baştaşlar üzerinde olarnı da bozmaq areketleriniñ izleri qalğanına aslı da emiyet bermey. Bu – avtomobil izleri degil.

Qırımtatar halqı Meclisiniñ Prezidiumı Qırımda musulman qabristanlarına ve camilerge nisbeten yapılğan vahşiylik sistem tüs alıp başlağanını, , bu, öz nevbetinde , militsiya organları cinayetçilerni qadırmağanı ve cezalamağanı sebebinden olğanını qayd eterek, Qırım Muhtar Cumhuriyeti Prokuraturasından Saraylı-Qıyatta musulman mezarlığında baştaşlarnı qırğan insanlarnı tapmaq ve keregi kibi taqiqat alıp barmaqnı talap ete.

Qırımtatar halqı Meclisiniñ prezidiumında

2012 senesi mart 23-te qabul etildi.