Qırımda kene mezarlar aqaret etildi

20 Mart 2012

Qırımda kene vandallıq yapıldı – Aqmescit rayonınıñ Saraylı –Qıyat köyündeki musulman mezarlığında bellisiz şahıslar baştaşlarnı aqaret ve viran ettiler.

2012 senesi mart 20 künü Saraylı-Qıyat köyündeki musulman qabristanındaki baştaşlar yıqtırılğanı ve parlanğanı aqqında haber kelgeninen köy sakinleri, Qırımtatar halqı Meclisi, Aqmescit regional meclisi ve Qırım musulmanları diniy idaresiniñ vekilleri mezarlıqta toplandılar.

Adise yüz bergen yerge yetip kelgen Ukraina İçki İşler Nazirligi Qırımdaki idaresi Aqmescit rayon bölügi ve Ukraina Telükesizlik Komitetiniñ Qırımdaki idare taqiqatçıları cinayet yapılğan yerni közden keçirip, akt tizdiler. Mezarlıqta Gülsum Mamet (1920 senesi doğğan) qabiri tamamile bozulğan, Seithalil Amet oğlunıñ baştaşı qırılğan, daa eki baştaşta yıqtırmaq areketleriniñ izleri qalğan. Da eki baştaş avtomobil çarpmasına oğratılğan.

Vandallıq yapılğan yerde bulunğan Milliy Meclis azaları Ali Hamzin, Zair Smedlâyev ve Ruslan Ennanovnıñ qayd etkenine köre Qırımda musulman mezarlıqları ve camilerine nisbeten böyle hiyanetlik nasıldır bir sistem tüsüni alıp başladı.

“Merhumlarımıznıñ hatırasını aqaretlegen, rahmetlilerniñ yaqınları ve balalarına accı ve keder yetkizgen, dindar insanlarnıñ duyğularını taptağan böyle vandallıq alları ileride tekrarlanmamasınıñ birden-bir yolu vahşiylerni cezalamaqtır. Teessüf ki, bundan evel yapılğan vandallıqlar boyunca ameliy bir çare körülmedi, qabaatlılar tapılmadı ve cezalanmadı”, -dep qayd etti Ali Hamzin.

Şunı da hatırlatmalı ki, Saraylı-Qıyatta bu kibi vandallıq 2010 senesi de yapılıp, mında qurulayatqan cami yaqılğan edi. Qabaatlılar alâ daa belgilenmedi ve cezalanmadılar.