«Qırım inkişafı vaqufı” yarış ilân ete»

20 Mart 2012

“Qırım inkişafı vaqufı” hayriye teşkilâtınıñ idaresi “Qırım variyeti” leyhasını amelge keçirüv çerçivesinde İsmail Gasprinskiyniñ icadına bağışlanğan eñ yahşı iş boyunca yarış keçirmek qararını aldı.

Yarışqa rus, qırımtatar,ukrain ve ingliz tillerinde yazılğan işler qabul etile. İşlerniñ mevzusı – İsmail Gasprinskiyniñ asabalığı Avropa ve Asiya medeniyetleri munasebetleri, çeşit milletler ve dinlerniñ eyiqomşulıqta bulunuv meseleleridir.

Qırım malzemelerinen bağlı olması talap etilgen işlerni “Qırım inkişafı vaqufı” hayriye teşkilâtı idaresiniñ elektron adresine yollap, müellif aqqında serbest şekilde berilgen malümat da eklenmeli. Yarışnıñ teşkilâtçıları işlerniñ kölemi ya da yaraştırıluvı boyunca iç bir türlü şart qoymay.

İşler 2012 senesi sentâbr 1-ge qadar qabul etilip, eñ mükemmel sayılğan soyları “Qırım inkişafı vaqufı” tarafından mukâfatlandırılacaq. 1-nci yer içün – 4000 grivnâ, eki 2-nci yer içün – 2000-yer grivnâ ve eki 3-nci yer içün 1000-yer grivnâ berilecek ve “Qırım variyeti” leyhası çerçivesinde derc olunacaqlar. Yarış ğalipleriniñ adları 2012 senesi sentâbr 23 künü ilân etilecek ve mukâfatları berilecek.

Malümat içün:

“Qırım variyeti” leyhası “Qırım inkişafı vaqufı”nıñ esas leyhasıdır. Onıñ maqsadı keçken asırnıñ ulu mütefekkirleri, faaliyetleri Qırım ile bağlı ve Qırımnıñ inkişafı içün ğayet qıymetli olğan cemaat erbapları İsmail Gasprinskiy, Pötr Grigorenko ve Andrey Saharovlarnıñ asabalığını kütleviyleştirüv ve tedqiq etüvdir.

Bu üç insan öz işleri ve faal areketlerinen Qırım ve umumen bütün Ukraina, Avropa ve Asiya medeniy inkişafınıñ yönelişini belgilediler. Eminliknen qayd etmek mümkün ki, olarnıñ asabalığı Qırım cemiyeti şekillenmesiniñ temelini teşkil ettiler.

“Qırım variyeti” leyhası biz kelecek nesillerge nasıl bir dünyanı qaldıracağımız hususında terence tüşünmege mecbur etip, bu dünyanı meşur insanlarnıñ büyük variyeti esasında şekillendirmege yardım ete.