Mustafa Cemilev «Rusiye cezalanğan halqları birligi»niñ delegatsiyasını qabul etti

17 Mart 2012

2012 senesi mart 17 künü Qırımtatar halqı Meclisiniñ reisi Mustafa Cemilev Meclis ofisinde Arkadiy Gorâyev reislik yapqan “Rusiye cezalanğan halqları birligi”niñ delegatsiyasını qabul etti

Delegatsiya erkânına Balqar halqı qartlar keñeşiniñ reisi İsmail Sabançiyev, “Çeçenler cemaat şurası” Dağıstan regional cemaat teşkilâtı reisiniñ muavini Sultan Şavhalov, İnğuş Cumhuriyeti “Mehk-Khel” Regional cemaat areketi Aliy keñeşiniñ azası İssa Ahilgov, Qaraçay-Çerkes “Qaraçay” cemaat fondınıñ prezidenti Hasan Halkeçev kirdiler.

Bütündünya qırımtatarlar kongressiniñ prezidenti Refat Çubarov, Meclisniñ informatsion siyaseti ve cemaat teşkilâtlarınen alâqalar boyunca idare başı Şevket Qaybullayev, Meclisniñ tışqı alâqalar bölüginiñ başı Ali Hamzin, Qırımtatar halqı genotsidini ögrenüv ve onıñ aqibetlerini yoq etüv boyunca Qurultaynıñ mahsus komissiyası reisiniñ muavini Elvedin Çubarov iştirak etken körüşüv devamında Mustafa Cemilev ve Refat Çubarov musafirlerniñ qırımtatar halqınıñ Qırımğa qaytuv oğrundaki küreşiniñ tarihına, Ukrainada qırımtatarlarnıñ bugünki vaziyeti, öz-özüni idare etüv milliy organlarnıñ faaliyetine ve öz halqınıñ problemlerini çezüvlde devlet organlarınen özara çalışuvğa dair suallerine cevap berdiler.

“Rusiye cezalanğan halqlarınıñ birligi” delegatsiyasınıñ azaları Kavkaz ve Qalmıqstannıñ sürgün etilgen halqlarınıñ aq-uquqları tiklenilmesi saasındaki meseleler hususında söz yürsettiler. Musafirlerniñ qayd etkenine köre, bu ceryan em federal, em regional seviyede manialarğa rastkele. Rusiye Federatsiyası bundan yigirmi yıl evelsi qabul etken “Cezalanğan halqlarnıñ aqlanıluvı aqqında” ve “Siyasiy basqı qurbanlarını aqlav aqqında” qanunları deyerlik çalışmay ve demek ki, Rusiyede keçmişte ceza ve basqığa oğratılğan halqlarğa nisbeten yapılğan cinayetniñ aqibetlerini yoq etüvni aslı da teminlemey.

Bunıñ kibi de körüşüvde tolusı aqlanuv meseleleri boyunca çeşit saalarda birlikte iş alıp baruv imkânları, SSSR devrinde sürgün etilgen halqlarnıñ ögünde devletniñ mesülieti muzakere olundı. Taraflar SSSR cezalanğan halqlar qurultayını keçirüvniñ zarurlığı hususındaki fikirnen razı olıp, qurultaynı Ukrainada keçirmek imkânlarını baqtılar.