«Qadınlarnı yılnıñ 365 künü devamında sevmek ve qorçalamaq – bizim borcumızdır», – dedi Qırımtatar halqı Meclisi reisiniñ muavini Remzi İlyasov

06 Mart 2012

Bu yılı birinci baar bayramını qayd etmek içün Qırımtatar qadınlar birligi Qırımtatar halqı Meclisiniñ muavini, Qırım Yuqarı Şurası Milletlerara munasebetler ve sürgün etilgen grajdanlarnıñ işleri boyunca daimiy komissiyanıñ reisi Remzi İlyasov ve Aqmescit şeer şurasınıñ deputatları Sadıh Tabah ve Seytumer Berberovnıñ qoltutuvında 2012 senesi mart 6 künü “Marakand” konferentsiyalar salonına devlet ve cumhuriyet mukâfatlarınıñ saibeleri, Qırımtatar qadınlar ligasınıñ azaları, icadiy ve ilmiy ziyalılar, Qırımtatar halqı Meclisiniñ hadimleri, jurnalistlerni davet etti.

Qadınlarnı hayırlamaq içün Qırımtatar halqı Meclisiniñ muavini, Qırım Yuqarı Şurası Milletlerara munasebetler ve sürgün etilgen grajdanlarnıñ işleri boyunca daimiy komissiyanıñ reisi Remzi İlyasov, Milletlerara munasebetler ve sürgün etilgen grajdanlarnıñ işleri boyunca cumhuriyet komitetiniñ reisi Edem Dudakov, Cumhuriyet informatsiya komiteti reisiniñ birinci muavini Şevket Memetov, Meclis azası, Aqmescit şeer şurasınıñ deputatı Sadıh Tabah, Aqmescit şeer şurasınıñ deputatı Seytumer Berberov keldiler.

“Bizim qırımtatar qadınlarımız aqqında men daima büyük sayğı ve sevginen aytam. Bizim musulman terbiyemizniñ temeli olarnıñ omuzlarındadır. Menden Mart 8-ni bizim bayramımız, dep saymaq ve qayd etmek mümkünmi, dep soradılar. Zanımca, bu bayramnı faqat Klara Tsetkinniñ adınen bağlamaq yañlıştır. 8 mart bu asılında halqara qadınlar bayramı, qadınlar künüdir. Amma bunıñnen analarımız, ömür arqadaşlarımız, apte ve qardaşlarımıznı yalıñız bu künü hayırlamaq kerek, demek olmaz. Biz yılnıñ 365 künü devamında olarğa diqqat ayırmaq kerekmiz!”, – dep hayırladı salonda bulunğan qadınlarnı Remzi İlyasov. Bunıñ kibi de o, qadınlar ve erkekler bayramlarını tesis etip, olarnı “Analar künü” ve “Babalar künü”, dep adlandırmaq teklifinen muracaat etti. “Bu bizim milliy bayramlarımız olur”, – dedi İlyasov.

“Qırımtatar qadını – bu işkir, aile ocağınıñ qoruyıcısı, sevgen ana, ikmetli ve sabırlı qarı”, – dedi “Arzı” mecmuasınıñ baş muarriri Lentara Halilova ve bütün qadınlarğa qaviy sağlıq ve eyilikler tiledi. Şunı da qayd etmeli ki, “Arzı” mecmuasınıñ nevbetteki sanı aynı bayram künlerinde dünya yüzüni kördi.

Milliy areketke qoşqan issesi, icadiy muvafaqiyetleri, ilmiy yeñişleri içün halqımıznıñ faal qadınları Ayşe Seytmuratova, Safinar Cemileva, Safure Kacametova, Gülnar Yağyayeva, Safiye Eminova ve Lentara Halilova fahriy yarlıqlarnen taqdirlendiler. Yarlıqlarnı Milletlerara munasebetler ve sürgün etilgen grajdanlarnıñ işleri boyunca cumhuriyet komitetiniñ reisi Edem Dudakov taqdim etti.

Tantanalı merasimni tatlılarnen donatılğan sofra yaraştırdı.