Elvida, Refat ağa, elvida, qıymetli safdaş!

04 Mart 2012

2-martta Miliy areketimizniñ faal iştirakçisi, II-IV Qırımtatar Milliy Qurultay (1991-2007) delegatı, 1993-1996 ss. Qırımtatar Milliy Meclisniñ ana tili, medeniyet ve din tiklenilmesi boyunca bölüginiñ yolbaşçısı, 1996-2007 seneleri Qurultay Teftiş Komissiyasınıñ azası, belli tarihçı ve ülkeşınas Refat ağa Kürti vefat etti.

Safımıznı ateşin vatanperver, milletsever, keçmişimizni terenden añlağan ve bilgilerini daima qırımtatar halq menfaatına işletken insan terk etti.

Refat ağa 1925 senesi Aqmescit şeerinde doğdı. Onıñ bala ve ösmürlik çağı er ceetten pek ağır zamanğa, gençligi ise qanlı-amansız cenkke rastkeldi. Yaşına baqmay, o, cebege tüşe. Kurslarnı keçip, subay ve cenkniñ soñunace bronetank bölükleriniñ komandiri ola.

R. Kürti orduda qala, arbiy akademiyanı bitire, yolbaşçı vazifelerde hızmet, halqınen beraber deşetli sürgünlikke tüşken yaqınlarına yardım ete. Polkovnik unvanında istefağa çıqqan soñ, grajdan işlerinde çalışa.

Daa orduda olğanda, 1950-60 seneleri, o, tarihnen meraqlana, Qırımnıñ keçmişinen bağlı malzemeler toplay ve mustaqil sürette bu ilimni ögrene. Refat ağanıñ bilgileri ket-kete terenleşip, oña sovet, şovinist tarihçılarnıñ Qırımnen bağlı “işleri”niñ uydurma ve sahteligini köstermege, milletimiz öz Vatanında asıl, tamır olğanını isbatlamağa imkân bere.

Onı Qırımnıñ ilk Ortaasır deviri, halqımıznıñ Qırımnen ebediy bağı ve etnogenezi, yarımadada İslâm dini üküm etmekten evel, yani qadimiylikten kelip saqlanğan urf-adetlerimiz, milliy ananelerimiz, umumen, medeniyetimiz ziyade meraqlandıra em de o, bu saada eñ bilgili mütehassıslarımızdan biri edi.

Ondan da ğayrı, Refat ağa halqımızğa nisbeten 1944 sene başlanğan misilsiz cinayetni büyük ğayret ile ögrenmege tırıştı. “Deportatsiya. Kak eto bılo” hatırlavlar cıyntığı üç kitabınıñ tertip eticisi, 2005-2012 ss. qırımtatar halqı genotsidini ve onıñ aqibetleriniñ ögüni almaq boyunca Qurultay meydanğa ketirgen Mahsus Komissiyanıñ azası oldı.

Refat ağa Kürti 18-mayıs umumqırım matem mitinginiñ azırlanuvında 20 yıl devamında eñ faal şekilde iştirak etip keldi, bu ve başqa cemaat işlerinde öz mesülietligi, sadeligi, mulâimligi, merametligi ile büyük sayğı qazandı.

O, bizim hatıramızda böyle olıp da yaşaycaq. Onıñ ömür arqadaşı Leylâ aptege, balaları, torunları ve diger yaqınlarına samimiy taziyemizni bildiremiz ve baş sağlığı tileymiz.

Safdaşımız Refat ağa Kürti Allanıñ rahmetinde olsun!

Qırımtatar Milliy Meclis
ve V Qırımtatar Milliy Qurultay
Teftiş Komissiyasınıñ azaları.