Meclis reisi Mustafa Cemilevniñ Aqmeçet rayonına iş ziyareti

27 Fevral 2012

2012 senesi fevral 26 künü Qırımtatar halqı Meclisiniñ reisi, Ukraina halq deputatı Mustafa Cemilev Aqmeçet regionında yaşağan semetdeşlernen körüşti.

Körüşüv devamında yerli meclislerge saylavlarnı azırlav ve keçirüv boyunca komissiyanıñ azası Zevcet Qurtümerov territorial komissiyalarnıñ azaları içün yerli meclislerge olacaq saylavlarğa azırlıqqa dair meselelerge bağışlanğan seminar keçirdi.

Şunı hatılatmalı ki, Aqmeçet regionınıñ öz-özüni idare etüv maalliy organlarına saylavlar 2012 senesi aprel 7-ge belgilendi

Qırımtatar halqı Meclisiniñ reisi Mustafa Cemilev ile Aqmeçet rayon devlet memuriyetiniñ salonında keçken körüşüvde Aqmeçet rayon devlet memuriyeti reisiniñ birinci muavini Damir İbadullayev, Aqmeçet regional meclisiniñ reisi Veli İbraimov, yerli meclisler ve diniy cemiyetlerniñ, “Maarifçi” birliginiñ Aqmeçet rayonındaki azaları iştirak ettiler.

Çıqışta bulunğan Mustafa Cemilev salonda bulunğanlarğa Ukraina ve Qırımdaki içtimaiy-siyasiy vaziyet boyunca malümat berip, 2012 senesi Ukraianada keçirilmesi planlaştırılğan müim vaqialarnı ayrıca qayd etti.

“Bu sene Qırımtatar halqı Qurultayınıñ yañı erkânı, bunıñ kibi de Qırımtatar halqıMeclisiniñ yañı reisi saylanacaq, – dedi Mustafa Cemilev. – Soñra Ukraina Yuqarı Şurasına umumdevlet saylavları olacaq. Bu saylavlarda qırımtatar halqı angi siyasiy küçke qoltutacağını Qırımtatar halqınıñ Qurultayı ve onıñ delegatları belgileycek”.

Bundan da ğayrı, Meclis reisi qırımtatar halqınıñ ömürinde daa bir müim vaqia – Qırımtatar halqınıñ öz Vatanında aqlarını ğayrıdan tiklev, Ukrainada onıñ telükesizligini teminlev boyunca halqara forum keçirilmesinde ayrıca toqtaldı. “Qırımtatar halqınıñ Meclisi ÖBSE Aliy komissarınıñ ofisi ile planlaştırılğan forumnıñ ğayeleri ve neticelerini muzakere etti, amma çoq şey Ukraina yolbaşçılarına bağlıdır. Biz ümüt etemiz ki, yaqın vaqıtta bu meseleler al etilir ve 2012 senesiniñ küzünde Halqara forum keçirilir.

Aqmeçet regionınıñ sakinlerine hıtap etken Meclis reisi M.Cemilev olarnı öz suallerinde, ağımdaki vaziyetni talil etüvde fikir bildirüvlerinde faal ve serbest olmalarını rica etti.

Salonda oturğanlar tarafından eñ çoq berilgen suallerden biri insanlarnı qanun boyunca alınğan ve endi çoqtan evler qurulıp, aileler yaşağan damartılarnı resmiyleştirmek aqqında edi. “Yerli akimiyet adamlarnı öz evlerine yazmaylar da, bu evlerniñ qullanıluvğa berilmegenini manaçıq eteler, – dep şiyaketlendi adamlar. Em problema resmiyleştirüv işiniñ uzun müddet sürgeninde degil de, bu iş içün talap etilgen pek palı fiyatlardadır.

Yerli diniy cemiyetlerniñ vekilleri Meclisniñ reisinden Aqmeçet qasabasında cami qurucılığı devam ettirilmesinde yardım soradılar. Caminiñ temelini yerli sakinler öz küçlerinen qoyğanlar, qurucılıqqa izin bergen vesiqalarnı, cami leyhasını da azırlağanlar. Tıpqı böyle ricanen Kirovskiy köyüniñ sakinleri de muracaat ettiler. Köyde cami bir qaç yıldan berli çalışa, amma minaresi alâ daa yoqtır.

Meclis reisi Mustafa Cemilev köterilgen meselelerni çezmek içün em Meclis tarafından, em şahsen özüniñ adından qolundan kelgeni qadar yardım bermekni işandırdı.

Körüşüvde çıqışta bulunğan “Maarifçi” birleşmesi Aqmeçet bölüginiñ Reisi Nuriye Abibullayeva Meclis yolbaşçılarına Aqmeçet qasabasında yerli balalar içün pek zarur olğan qırımtatar tilli bağça-mektep qurulmasında yardım sorap muracaatta bulundı.

“Bizim Qırım” halqara gençler teşkilâtınıñ ağımdaki faaliyeti aqqında onıñ reisi, aynı zamanda 5-nci çağırılış Qurultay delegatı Abduraman Egiz tarif etti ve regionnıñ yaşlarını daa da faal olmağa çağırdı.