Ukraina Yuqarı Şurası İnsan aqları boyunca vekiliniñ ofisi Minaciyevler ailesiniñ uquqlarını qorçalaycaq

23 Fevral 2012

2012 senesi yanvar 23-te Kezlevdeki çoqqatlı evniñ mağazından mında yaşamağa başqa yerleri olmağanı sebebinden yaşamaq zoruna qalğan Minaciyevlerniñ 2002 ve 2011 senesi doğğan eki balası olğan aile zorluq ile tışarı çıqarıldı. Qışnıñ eñ suvuq künleri, yarımadada tabiiy afat olacağı beklenilgen bir vaqıtta insanlar vahşiy usulnen soqaqqa quvuldılar. Albu ki, olar yerli akimlerge mahkeme qararı edasınıñ müddetini biraz uzatmaq arizasınen defalarca muracaat etkenler. Lâkin devlet hadimleri buña emiyet bermegeni cemaatnıñ ğadabını qozğadı.

2012 senesi fevral 9 künü Qırımtatar halqı Meclisiniñ reisi, Ukraina halq deputatı Mustafa Cemilev Ukraina Yuqarı Şurasınıñ temsilcisi N. Karpaçövanıñ adına mektüp yazıp, ağır vaziyette qalğan insanlarnıñ mesken, sağlıq ve hayatqa olğan qanuniy uquqlarını qorçalamasını rica etti.

Öz muracaatında M.Cemilev, cümleden şularnı yazdı: ” … halqımız toplu şekilde tarihiy Vatanı Qırımğa qaytqanda yaşamağa yeri olmağan bazı aileler Kezlevdeki çoqqatlı evlerniñ mağazlarında yerleştiler. Bu aileler qanun boyunca ayrıca mesken nevbetinde turğanlarına baqmadan sürgünlikten qaytqanlarnı yerleştirüv ve abadanlaştıruv programmasına yeterli miqdarda sermiya ayırılmağanı sebebinden yaqın vaqıtta olarnı meskennen teminlemekniñ imkânı yoqtır. Soñki 20 yıl içinde vaziyet iç deñişmedi, çoqtan beklenilgen evlerine köçmek arzusınen bu aileler alâ daa mağazlarda yaşamaqnı devam eteler.

Bütün bu yıllar devamında şu insanlarnı mağazlardan öz evlerine köçürmek boyunca şeer akimiyeti iç bir türlü çare körmedi. Mezkür mağazlarda yaş balalı aileler, qartlar yaşamaqtalar.

Qayd ettiklerimni ve vaziyetniñ adden tış olğanını esapqa alaraq, Sizden bu insanlarnıñ aqlarını qorçalamañıznı rica etem. Bunıñ kibi de, böyle suvuqta aile yaş balalarınen soqaqqa quvulğanda olarnı ne prokuratura, ne de içtimaiy organlar qorçalamadı. Bu mesele de kerek seviyede muzakere etilmeli. Bundan da ğayrı, sürgünlikten qaytqan ailelerni olarnıñ mesken meseleleri çezilmegenge qadar çıqarmaqnı toqtatıp, insanlarnı ayazda tışqa quvulmasında qabaatlılar cevapkârlıqqa çekilsin”.

2012 senesi fevral 17 künü Ukraina Yuqarı Şurası İnsan aqları boyunca temsilcisiniñ ofisi mezkür adise boyunca iş açıp, Minaciyevler ailesiniñ meskenge olğan qanuniy uquqlarınıñ bozuluvı munasebetinen taqiqat keçirilecegini bildirdi.