Menu 
«Başqaları bahıtsız olğanda, yanındaki bir halq bahıtlı olamaz!»
21 Fevral 2012
2012 senesi fevral 21 künü Aqmescitteki P. Grigorenko adına (Sovetskaya) meydanda qırımtatar ve ukrain cemaatçılığı Petra Grigorenko eykeline çeçek qoydı. Qırımtatar halqınıñ Meclisi tarafından Qırımdaki ukrain milliy- demokratik küçler, qırımtatar milliy areketi vekilleri ve gençler teşkilâtlarınen birlikte azırlanğan bu merasim qırımtatarlarnıñ büyük dostu, belli uquqqoruyıcı, general Petr Grigorenko vefat etkenine 25 yıl olğanı munasebetinen ötkerildi.
Qırımtatarlar içün pek çoq iş yapqan, halqımıznıñ aqiqiy dostunıñ hatırasını añmaq maqsadınen meydanğa çeşit millet vekilleri kelip, olarnıñ arasında cesür uquqqoruyıcı, insan aqları içün bütün barlığınen küreşken, sovetler devrinde generallıq rutbesi oña bergen imtiyazlardan vazgeçe bilgen ve bunıñ içün tuvğan yurtundan quvulğan Petr Grigorenkonı şahsen tanığan-bilgen insanlar da bar edi.
“SSSRde dissidentlik areketinde bir sıra parlaq şahıslar olıp, – dedi Qırımtatar halqı Qurultayınıñ delegatı Elvedin Çubarov, – qırımtatar halqı olarnıñ totalitar rejimge qarşı küreşine qoltuttı. Aynı zamanda dissidentler de Vatanğa qaytmaq ve aq-uquqlarını tiklemek içün areket etken qırımtatar teşebbüsçilerine qoltuttılar. Pötr Grigorenko qırımtatar halqınıñ eñ sadıq dostu edi”.
Pötr Grigorenko eykeline çeçekler qoyuv merasiminde çıqışta bulunğan Ukrain milletçiler kongressi Qırım bölüginiñ başı Vasiliy Ovçaruk “bugün bizim bütün ömürimiz Pötr Grigorenkonıñ adınen bağlıdır. O, ukrain halqınıñ sadıq evlâdıdır. Ukrain halqı ise yanındaki diger bir halq bahıtsız olğan, öz aqları ve Vatanğa qaytmaq içün küreş alıp barğan bir vaqıtta bahıtlı olamaz”, dedi.
Bunıñ kibi de mitingde Ukraina Halq Areketi (RUH) Qırım teşkilâtınıñ reisi, Qırım Yuqarı Şurasınıñ deputatı Leonid Pilunskiy, professor Roman Yaremçuk, “Bizim Qırım” halqara gençler teşkilâtınıñ reisi Abduraman Egiz, Petr Grigorenkonıñ safdaşı, milliy areket veteranı Kazim Ceparov ve digerleri çıqış yaptılar.
O, öz maneviy ve insanlıq borcunı er şeyden üstün qoyğan insanlar sırasında edi”, degen edi 2010 senesi oktâbr ayında Ukraina halq deputatı, Meclis reisi Mustafa Cemilev.
Pötr Grigorenkonıñ hatırasına bağışlanğan añma merasiminde esli-başlı insanlarnen bir sırada pek çoq gençlerniñ de iştirak etmesi aqiqiy İnsan ve qaraman Petr Grigorenko kelecek nesiller içün de ibret olacağından delâlet bere ve sevindire.
